Mga SoCCom nga Pinadala, Nakadawat og Basbas

Atol sa selebrasyon sa Dominggo sa Pentekostes o kasumaran sa adlaw’ng natawhan sa nag-inusarang apostolikanhong simbahan ug ang pagkunsad sa Balaang Espiritu, ang mga Social Communications Committee members nga pinadala nakadawat og basbas dinhi sakop sa St. Mary of the Perpetual Rosary Parish, Buhangin kaniadtong Mayo 28, 2023. Gipangulohan sa kura paroko, Rev. Fr. Dionisio Tabiliran pinaagi sa usa ka Santos nga Misa nga gisaulog sa alas 3:30 sa kahapunon.

Sa alas 2:00 sa hapon gisugdan ang pagpa rehistro sa tanang GKK SoCCom members tinabangan sa SoCCom Core Group ug ang paghatag sa Act of Commitment Form nga ilang pirmahan sa dili pa ang sending forth diha sa Parish Conference Room. Alang sa pagpangandam sa commissioning sa pagbag-o, pagdawat sa katungdanan, ug ang pagtahan isip pinadala, sila mitambong kaniadtong Octobre 30, 2022 sa Four Basic Seminar og gisundan kaniadtong Enero 29, 2023 alang sa Stewardship/Christian Spirituality Seminar og sa Abril 30, 2023 alang sa Formation on SoCCom as Correspondents of the Church: News-Gatherer, Reporter, Writer/Tips on How to Write Minutes of the Meeting nga gipahigayon ngadto sa bag-o ug daan nga GKK SoCCom nga maoy kinahanglanon aron ma apil sa sending forth. Kining tanan pinasikad ug gipangunahan sa Parish SoCCom Coordinator, Ms. Hermelita Mapute.

Si Fr. Diony miingon sa iyang homiliya nga haom sa maong pagkomisyon;

“Nga si Kristo nagpakita sa mga tinun-an ug miingon ‘Ang Kalinaw Maanaa Kaninyo’ giingon ni Jesus kini sa ikaduhang higayon aron ipasiugda nga adunay kalinaw! Kalinaw gikan sa iyang pagkamatay ug ngadto sa iyang pagkabanhaw. Heart is the only place of Peace! Ang pagkomisyon ug pagpadala sa kaugalingon ni Jesus ngadto sa mga apostoles, ug ang pagpadala ni Jesus kanato mao ang tuburan sa gugma ug kalinaw nga iyang gibilin kanatong tanan. Nga diha sa pagtayhop sa Ginoo sa tawo nasinati ang kinabuhi ug Balaang Espiritu, isip timaan nga ang Espiritu Santo maoy kamatuoran, kahibalo, giya sa pagpadayag ug pagpaambit sa maayong balita sa Ginoo.”

Ang simbahan ang gihimo nga instrumento aron masinati nato ang Balaang Espiritu, nadawat nato pinaagi sa bunyag, pagkumpirma ug diha sa selebrasyon sa Santos nga Yukaristiya diin puno sa Espiritu Santo. Kita awtorisado sa pagsabwag sa maayong balita sa DIOS ug masinati nato ang kapasayloan ingon nga kita mopasaylo sa atong mga kaigsoonan ug kita mangalagad sa kahimayaan sa DIOS. We are the extension of forgiveness; we are the ministry of forgiveness. God will forgive and save us!

Human sa homiliya, gisal-ot ang rito sa pagbasbas sa mga GKK SoCCom pinaagi sa pagpresentar sa Parish SoCCom Coordinator, Ms. Hermelita Mapute sa 64 ka mga kandidato. Gipahinumdom ni Fr. Diony ang mahitungod sa Roles and Functions sa SoCCom, siya miingon: “Ang SoCCom usa ka sakop sa GKK Servant Leaders, ang inyong katungdanan ang motipig sa mga record, mopatigayon sa dagan sa komunikasyon sa mga GKK, motala ug motipig sa minutas sa mga mitings, mobag-o o update sa GKK Registry, moandam, mohatag, mopirma sa Information Data Sheet, mopatigayon sa pagpadagan sa mga impormasyon gikan sa Parokya padulong sa GKK ug modokumento sa mga importanteng panghitabo diha sa GKK pinaagi sa pagsulat, paghulagway o video.” Pagkahuman, gisunod ang pagampo sa mga GKK SoCCom diin gibendisyonan ginamit ang balaang tubig nga nagsimbulo sa kinabuhi.

Gitimbaya ang tinuod nga kalampusan sa gihimo nga pagbasbas sa 64 ka mga GKK SoCCom nga midawat sa panalangin isip mga pinadala ug opisyal nga miyembro sa Social Communications Committee. Diin diha sa ilang pagdawat sa katungdanan, ang pagpakigdait sa mga katawhan ug mahuptan ang hiyas ni Kristo nga maalagaron ug dili maoy alagaran. (Arsenio H. Berdera Jr. | St. Mary of the Perpetual Rosary Parish – GKK SoCCom)