Mayo: Bulak ug Bulan Alang Kang Maria

Ang tibuok bulan sa Mayo, gihalad isip pahinungod sa Mahal nga Birhen Maria. Sulod niining bulana ang tibuok Pilipinas nagpahigayon sa tradisyon nga Flores de Mayo diin ang mga kabataan nagtapok sa matag kapilya aron sa paghalad og bulak ug mga alawiton alang kang Mama Maria. Ang parokya sa St. Mary of the Perpetual Rosary nagpahigayon niining kalihukan sulod sa mga GKK nga nahisakop niini.

Ang mga katekista sa nagkalain-laing katilingban maoy nanguna sa pagpahigayon sa Flores de Mayo. Tungod kay aduna pay klase ang mga kabataan, ginahimo kini matag Sabado ug Dominggo. Niining mga taknaa, adunay ginahatag na hamubong mga leksyon kon katekesis sa mga bata mahitungod kang Birhen Maria. Ginatudloan usab sila unsaon pag-ampo sa Santos nga Rosaryo. Nakatuon usab ang mga bata sa mga nagkalain-laing mga alawiton ug sayaw isip pagdayeg sa Dios. Dinhi gihatagan og dakong importansya ang papel ni Maria sa atong Kaluwasan.

Niadtong Mayo 27, 2023 gipahigayon ang kulminasyon sa Flores de Mayo sa parokya. Adunay duha ka hugna ang maong Culmination Day. Sa buntag gisugdan kini sa pag-ampo sa Santos nga Rosaryo nga gipangulohan sa mga katekista. Miduyog ang mga kabataan sa maong pag-ampo sulod sa simbahan. Matag misteryo ihalad ang matag letra sa Ave Maria samtang gina awit ang kanta nga “Sa Trece sa Mayo”

Misunod ang kasaulogan sa Santos nga Misa nga gipangulohan ni Rev. Fr. Romeo “Romy” Coronel, OSA, diin nalingaw ang mga kabataan tungod kay sulod sa homiliya ni Fr. Romy, gitudloan niya og action song ang mga kabataan. Nagpahigayon pud siya og question and answer nga adunay gamay’ng pahalipay alang sa mga kabataan. Matod pa ni Fr. Romy, nga si Maria mao ang instrumento sa atong kaluwasan. Siya Inahan ni Hesus ug nahimo usab nga Inahan sa Simbahan ug kanatong tanan.

Pagkahuman sa Santos nga Misa misunod dayon ang parlor games alang sa mga kabataan nga gipangulohan sa mga katekista nga sila Jacky Ramos ug Cristina Catigara. Malipayon ang mga kabataan sa ilang pagapil sa mga giandam nga mga padula sama sa Message Relay, Bring Me, Questions and Answers. Gihuman ang mga kalihukan pinaagi sa salo-salo nga giandam alang sa tanan.

Pagka hapon gisugdan ang Santacruzan pinaagi sa pagampo ug pagawit sa Lupang Hinirang. Mihatag usab si Mrs. Dionisia Devera, Head Catechist sa St. Mary Parish sa iyang welcome address. Sa Santacruzan gihandom ang pagkakaplag ni Rayna Elena sa Balaang Krus. Ang pipila sa mga GKKs nagpadala sa ilang mga Rayna sa Santacruzan. Ang matag Rayna nagrepresenta sa hiyas ug titulo ni Maria, mga balaang babaye ug lalaki ug labaw sa tanan ang pinakaimportante nga titulo nga mao si Rayna Elena inubanan ni Haring Constantino. Gipaila-ila ang matag partisipante diin ilang gisul-ob ang mga costume nga nagrepresenta sa ilang assigned na Rayna.

Human sa presentasyon sa mga Rayna sa Santacruzan, adunay intermission number ang mga Pangulo sa Pagpanudlo/Katekista. Human niini gihatagan og Certificate of Participation ang mga miapil sa Santacruzan.

Ang katapusang bahin sa kalihukan naglangkob sa hamubong pagprusisyon sa Imahe ni Santa Maria inubanan sa mga Rayna sa Santacruzan ug sa mga katawhan diin mihalad og awit kang Santa Maria ang tanan. Pagbalik sa parish gym miawit sila ug Adios Rayna sa langit ug dayon misunod ang Katapusang Panalangin.

Nahimong malipayon, mabungahon ug malampuson kining maong kalihukan tungod sa pakigbisog sa mga katekista, partisipasyon sa mga kabataan, suporta sa mga ginikanan ug GSLs sa parokya ilabi na sa tanan tungod sa giya ni Santa Maria ug sa grasya sa atong Ginoo.

Ave Maria!

(Allyza Hope Tabigue, GKK SoCCom/Youth Catechist)