Kinabuhi diha sa Dios

Ika-13 nga Domingo sa Ordinaryong Panahon (July 2, 2023)
2Kg 4:8-11, 14-16a / Ps 89:2-3, 16-17, 18-19 / Rom 6:3-4, 8-11 / Mt 10:37-42

Ang mangita sa iyang kinabuhi mawad-an niini, ug ang mawad-an sa iyang kinabuhi tungod kanako, makakaplag niini” (Mt. 10:39). Kining maong sambingay ni Jesus makahuloganon kaayo ug nagtangag og lawom nga kahulogan diha sa atong kinabuhi. Kining maong pagtulon-an nakasentro niadtong nagpuyo diha lamang sa kaugalingong paagi. Ang mga pangandoy sa ilang kinabuhi mao lamang ang pagpalambo sa ilang mga kaugalingon ug nagsalig lamang sa ilang kaugalingong katakos. Apan ang atong Ginoo nagklaro nga kon ang atong pagpuyo diha lamang sa atong kaugalingon kita mawad-an sa kahigayonan sa kamahinungdanon sa kinabuhi. Mawala ang atong partisipasyon sa komunidad. Kon ang atong pagpuyo sa kinabuhi diha sa paghatag sa uban kita makakaplag ug kapuno. Kita makabuhat sa tinuod nga katuyoan sa atong kinabuhi. Sa ingon niini, ang atong kinabuhi mabuhong sa mga grasya sa Dios nga mao ang kapuno sa kinabuhi diha sa lawom nga matang sa paghigugma.

Ang pagpakita ug panig-ingnan sa atong Ginoo. Siya usa ka Dios, ang ikaduhang persona diha sa Santisima Trinidad, perpektong panag-uban sa Amahan ug Espiritu Santo diha sa kahangturan. Ang kinabuhi sa atong Ginoo nagdan-ag sa matuod nga gugma. Siya mapaubsanong nagtuman sa kabubut-on sa Amahan nga makig-uban kanato samag tawo. Siya nag-antus sa hilabihan ug namatay sa krus. Kini nagpakita sa iyang naghingapin nga gugma alang kanato. Ang iyang sakripisyo nagpadayag kon si kinsa gayod siya. Siya ang guma. Ang gugma nga andam mohatag sa iyang kaugalingon. Ang gugma nga naglantaw sa kaayohan sa uban. Kini nga matang sa gugma motuman sa hinigugma kung kini putli, balaan, dili hakog ug hingpit. Ang sakripisyo sa atong Ginoo didto sa krus wala lamang magluwas kanato, apan kini usab nagpakita sa Anak sa Dios sa kaugalingong hingpit nga katumanan ug katagbawan sa iyang tawhanon nga kinaiya tungod kay ang iyang kamatayon usa ka buhat sa putli nga gugma. Sa atong paghigugma sa Dios ug sa atong isigka-ingon diha sa putli nga paagi, kita mamahimong matinud-anon sa intensiyon sa atong magbubuhat. Amen. (Rev. Soren Abellanosa)