Hagit sa Pagkamanggihatagon

Mayo 25,2023 – Gisaulog ang ika-50 ka tuig nga kapistahan sa GKK Sr. San Isidro Labrador Siao Pangyan, sa parokya sa San Roque Parish-Malabog uban sa tema: “Sr. San Isidro Labrador sumbanan sa tiunay nga pagkapiniyalan ug buhing saksi sa kamatuoran pinaagi sa iyang pagtoo ug kinabuhi.”

Gisugdan kini sa usa ka Santos nga Misa nga gipangulohan sa kura paruko nga si Rev. Fr.Arnold Balaquinto og sa bag-o lang naordinahan nga diakono nga si Rev. Junel E. Bustamante. Sa Pamalandong ni Rev. Junel “50 ka tuig nata og atong hinumdoman kadtong mga tawo nga maoy hinungdan nga namugna kining maong katilingban, tungod kanila wala na kita maglisud, tungod ilaha nga giandam nga mamahimo kitang sumusunod sa pagtoo nga ilahang gisugdan uban sa pangama ni Sr. San Isidro Labrador.”

Dako kaayo iyahang kalipay nga nagtan-aw sa mga batan-on og mga kabataan kay buhi kaayo ang pagtoo sa katilingban tungod sa ilahang presensiya, kay sila man ang sumusunod sa atong pagtoo. Mipaambit usab siya sa iyang katesismo bahin sa kinabuhi ni Sr. San Isidro Labrador og ang pulong “Labrar” nga sa Espanyol nga pinulungan nagkahulugan og mag-uuma o magdadaro. Pobre kaayo siya gikan sa yano nga ginikanan ug ang iyang ginikanan nagdasig kaniya sa gugma sa Dios og sa kalisang sa pagpakasala.

Ang maong GKK gilangkuban og 45 ka mga miyembro, katilingban nga nagkahiusa og nagpabiling lig-on uban sa ilahang maabtikon nga PSK nga mao si Medardo “Medu” Bantawig Sr. Matud pa niya “wala ako’y mahimo kung wala kamo”. Nagpaabot siya sa iyang kinasingkasing nga pagpasalamat sa tanan nga mitabang aron mahimong magmalampuson ang ilang kapistahan ug ang tanang Pangulo sa Katilingban nakadawat ug dakong gasa nga panalangin gikan ni Rev. Junel.

Mipadangat usab og mensahe pasalamat ang kura paruko, Rev Fr.Arnold Balaquinto sa tanang Sona 6 nga mga pangulo og myembro sa nagkalainlaing GKK, mga parish staff og ilabina ang mga seminarista. Mapasalamaton usab ang bag-ong naordinahan nga diakono sa tanang pagsuporta kaniya og nanghinaut nga daghan pang seminarista nga makalahutay og gani nag-awhag sab siya sa tanan nga gustong mosulod isip seminarista.

Niadtong adlawa, 12 ka mga bata ang nakadawat sa Sakramento sa Bunyag.

Ang napabiling hagit alang kanatong tanan, unahon kanunay ang Ginoo kay ang tanan natong pagpaningkamot kung wala ang Ginoo kawang lamang. Dunay panultihon nga nagkanayon, “walay datu nga wala nagkinahanglan ug walay pobre nga dili makahatag.” Kitang tanan pwede kaayo nga makahatag ug ang labing bililhong gasa nga atong mahatag mao ang panahon og ang presensiya. Ang presensiya dako kaayong gasa kanatong tanan.

Sama kang Sr. San Isidro Labrador piniyalan lang pod kita sa mga gasa nga gihatag kanato sa Ginoo, mao nga kinahanglan nato nga ipaambit ngadto sa uban. Magbuhat kita sa kabubut-on sa Dios ug nga kita dili maluya ug isalig nato sa Ginoo ang tanan.

Hinaut unta nga ang gasa ni Sr. San Isidro magpahinumdom kanato kanunay nga kitang tanan mga piniyalan sa mga gasa nga gihatag sa Ginoo nganhi kanato ug gihagit kita nga ipaambit kini ngadto sa uban.

HAPPY FIESTA!!! VIVA SR.SAN ISIDRO LABRADOR!!!

(Noralyn T. Largo | San Roque Parish Soccom – Malabog)