GKK Day: Pagpadala Sa Mga GSL’s

Ang pagpangalagad maoy usa ka hagit dili lang para sa atung kaugalingon. Sa atung pagpangalagad, dili nato wad-on ang tumong diha sa pagpaambit sa atong kaugalingon ngadto sa uban.

Ang Parokya sa Our Mother of Perpetual Help, misaulog sa ilang GKK day niadtong Hunyo 4, 2023 sa alas sais sa buntag pinaagi sa Santos nga Misa nga gipangulohan ni Rev. Fr. Cruzito Manding, CSsR atol sa Solemnidad sa Santisima Trinidad. Sulod sa maong selebrasyon gipahigayon ang panalangin sa pagpadala sa mga pangulo sa pag-alagad sa GKK ug gibendisyonan ang trenta’y dos (32) ka mga GKKs ug ilang tagsa-tagsa ka mga lideres. Gidasig sab ni Padre Cruz ang grupo sa Adoracion Nocturna nga hangtud karon nagpabilin sa grupo ug nagadeboto sa Santisimo Sacramento sa altar ilabina kada unang Dominggo ug kung dunay dakung pista sa simbahan.

Daghan nga manimbahay ang nadasig nga nakasaksi nga ilang mga alagad nga lideres andam mupaambit sa ilang oras, talento ug bahandi sa ngalan sa ilang pagpasalig sa simbahan.

Nanghinaut ang tanan nga magmalapuson pa ang ilang pagpangalagad. (Mary Grace Gonzales | OMPH Parish Soccom)