Gasa sa Pagtoo, Pagpa-ambit sa Kahibalo

June 12, 2023 Adlaw sa Kagawasan, gisaulog kini sa San Roque Parish-Malabog sa alas sais y media sa buntag adlaw’ng Lunes. Gisugdan ang Santos nga Misa diha sa pagbendisyon sa duha ka flag simbolo sa Espanya ug Pilipinas nga gipangulohan ni Father Arnold Balaquinto, gitambongan usab kini sa mga GSL nga wala mapadala niadtong miaging Dominggo atol sa GKK Day.

Kinutlo sa wali ni Father Arnold, ang gugma daw murag Adlaw sa Kagawasan, kay bisan pa kapila ta mapasakitan dali ra ta mahuwasan, kay imo man nga ipaglaban. Kining adlaw sa pagdeklara nga Adlaw sa Kagawasan mapasalamaton kita sa mga Espanyol nga nagdala kanato og Katolisismo ug sa mga Amerikano nga naghatag kanato og Kagawasan sa atong Nasud Pilipinas. Mapasalamaton usab Kita sa Dios sa mga gasa nga atong nadawat gikan sa Espanya ug Amerika sa bisan unsa nga pamaagi, kay sa daghang katuigan kita nag antos sa kaulaw, kasakit og sakripisyo apan karon kapin 500 nga katuigan kita nagasaulog sa gasa sa pagtoo ug ang gasa sa demokrasya,125 na katuig nato kini nga gisaulog, gani daghan kaayong mobisita sa Malabog, moingon nga sa una hadlok kaayong tan-awon, apan karon gawasnon na kaming mosaka dinhi bisan tuod adunay kabalaka sa dalan, tungod kay ang dalan dili basehanan sa kahadlok.

Matod pa ni Father Arnold diha sa atong kinabuhi unsa man ang tinuod nga kagawasan? Tinuod ba gayud nga kita gawasnon? Unsa man ang tinuod nga kagawasan alang kanato, kana bang mag sige tag katawa? sige og kalipay? kanang daghan kag kwarta? kanang daghan kaayo kag bahandi? o kanang daghan kaayo kag higala? Mao ba kana ang tinuod nga kagawasan? Diha sa atong kinabuhi ang tinuod nga kagawasan mao ang pagpuyo nga malipayon, maampoon ug makontento uban sa gugma sa Dios.

Gisunod ang pagpadala sa mga GSL og pagbag-o sa ilang Panaad sa Pagpangalagad diha sa ilang tagsa tagsa ka GKK. Human sa Santos nga Misa ang ubang mga GKK Leader ilabina ang mga GSL sa San Isidro Labrador – Sumimao sakop sa Sona 2. nagpasiugda og Tree Planting Activity agi’g pagselebrar sa Adlaw sa Kagawasan, og gawasnon kami nga motabang sa among Barangay ilabina sa among GKK aron ma protektahan ang pagpanglaka sa yuta nga haduol sa gikahimutangan sa among kapilya, kabalayan og mga uma sa lumolupyo sa among komunidad panahon sa ting-ulan kay maapektuhan gayud sa pagbaha.

Mapasalamaton kaayo ko sa tanan nga nipartisipar sa maong kalihukan uban sa pagtugot sa tag-iya sa yuta nga gikahimutangan sa among Kapilya nga si Soliman Vistal, sa among PSK, kapulisan og sa mga kababayen-an uban sa pakigduyog sa among Barangay Council nga mahimong malampuson kining Pagsaulog namo sa Independence Day.

Mabuhay! Dalaygon ang Dios sa Kanunay!

(Arlene R. Tarnate | San Roque Parish-Malabog Soccom)