Buhi ang Presensya sa Kabatan-onan

Malampuson ug malipayong gisaulog ang ika-16 nga Kapistahan sa Parokya sa Mary Help of Christians niadtong Mayo 27, 2023 nga adunay tema: “As the yeast in today’s human family – the lay dimension in the Family of Don Bosco”.

Ang maong selebrasyon nagsugod sa Santos nga Misa nga gipangulohan sa atong halangdon Arsobispo sa Davao, Most Rev. Romulo G. Valles, D.D. Sa iyang homiliya, iyang gidayeg ang presensya sa mga kabatan-onan tungod ubay-ubay ang mga mitambong sa Misa.

Tuod man kusog ug buhi gyud ang partisipasyon sa mga kabatan-onan. Ilang gipakita ang ilahang talento isip pagpasalamat sa mga gasa nga gipiyal kanila pinaagi sa pagsayaw, kanta, ug drama kon (cinephone).

Ang cinephone mao ang usa sa highlights sa maong selebrasyon diin halos tanan sa entry niini gikuha basi sa mga tinood nga panghitabo ug mga kasinatian. Kini nga mga scenario nagtubag diha sa pangutana nga, “isip usa ka pangulo giunsa nimo pagpakita ang imong debosyon kang Sta. Maria?” Ang mga maong aktibidad gipangulohan sa Don Bosco-Dacudao Youth Council (DB-D-YC) kauban ang ilang Parish Youth Leader nga si Mr. Jeffrey Mondejar.

Usa sad sa mga gipahigayon nga aktibidad mao ang inter zonal food menu contest diin ang mga pangulo sa taga GKK nagpakita sa ilang talento sa pagluto ug nagkalain-laing klase sa pagluto ug potahe diin ang main ingredient ang karne sa baboy. Nahimong mananaog ang Zone 1B nga naghimo ug sama sa buffalo wings nga nilutoan pinarisan ug salad nga ang main ingredient mao ang pinya.

Dakong pagpasalamat ang gipadayag ni Rev. Fr. John Cardinal, SDB— Kura Paroko sa maong parokya ug ni Rev. Fr. Ariel Arias ang Parish Vicar ngadto sa atong Inahan, Maria Mananabang sa mga Kristyanos, kay Bishop Romulo G. Valles, D.D, sa mga pangulo, kabatan-onan, ug ilabi na gayud sa mga parishioners nga tungod kanila nagmalampuson ang kapistahan sa Maria Mananabang sa mga Kristyianos. (Honey Vine, Parish SoCCom | Photos by Arrafe Sumampong)