Ang Piniyalan uban sa Santisima Trinidad

Ang 58 ka GKK nga sakop sa San Roque Parish Malabog gilangkuban sa mga GSL ug miyembro sa tagsa-tagsa ka GKK nanimba sa parokya atol sa Pagsaulog sa GKK Day ug Solemnidad sa Santisima Trinidad uban sa tema: “Santisima Trinidad tuburan sa kahiusahan sa pagpanag-uban sa panaw sa Misyon sa GKK sa diwa sa Pagka Piniyalan.” Dala nila ang imahen sa ilang Patron sa GKK ug ang gitahasan sa pagdala mao ang PSK sa GKK niadtong Hunyo 4,2023 adlaw’ng Dominggo. Gisugdan ang Santos nga Misa sa alas otso sa buntag nga gipangulohan ni Father Arnold Balaquinto kura paroko.

Diha sa iyang homiliya ang GKK alang kaniya murag gugma, kay bisan luyo sa mga tawhanong kakulangan, sakripisyo og mga pagsulay, kon mangalagad sa tinud-anay magbunga kini sa walay sukod nga katawa, hudyaka og kalipay. Kalipay nga nagsukad sa tinuod nga gugma nga sa atong Dios Amahan, Anak og Espiritu Santo kanato gibuhagay. Kay ang gugma man dili magpalayo kondili magpaduol. Human sa iyang homiliya gisunod ang pagbag-o sa panaad sa tanang mga GSL sa 58 ka GKK nga mopadayon pa sa ilang pagpangalagad sa katilingban kon diin sila nahisakop og diha usab sa Parokya.

Malipayon ug madasigon ang tanan nga nagbag-o sa ilang panaad diha sa ilang Pagpangalagad sa tagsa-tagsa ka ministriya. Human sa Santos nga Misa gisunod ang pagparada sa mga Imahen sa Patron sa matag GKK gipangunahan sa kapulisan, Altar Servers, Parish Coordinators, Zone Coordinators og Sona 1 to 11 uban sa mga GSL og miyembro. Adunay giandam nga programa ang Ministriya sa PSK nga gipangulohan ni Victoria Alferez PSK Parish Coordinator. Sa Programa adunay gigahin nga 30 minutos sa pagpasabot sa Revisiting The Yellow Book nga gidumala ni Reynaldo Casanillo PSL Parish Coordinator, gisunod pud ang re-echo sa Stewardship Frontliners Seminar nga gidumala ni Jeanet Arañez PSP Parish Coordinator.

Gipasidunggan usab ang mga GSL nga dugay nang nangalagad diha sa ilang GKK ilabina sa pagsugod kanus-a natukod ang parokya, 38 ka tuig na ang milabay. Adunay 18 ka GSL nga nakadawat og sertipiko nga nagmapasalamaton. Matod pa ni Eddie Novo nalipay siya kay isa siya sa napasidunggan og nakita ang ilang pagkamatinud-anon diha sa ilang pagpangalagad sa katilingban ilabina sa Langitnong Amahan, Anak og Espiritu Santo nga mao ang Santisima Trinidad.

Naghatag si Father Arnold og inspirational talk, matod pa niya atol usab niining adlawa Hunyo 4 nga naabot siya sa San Roque Parish-Malabog, lima na katuig ang milabay, sa iyang pag-abot dinhi gitan-aw niya ang palibot naka-ingon siya sa iyang kaugalingon “kamingaw,” apan sa nakakita siya’g ring sa basketball court naka-ingon pud siya nga “ok na ni,” dala pahiyom. Mapasalamaton usab siya sa mga parokyano nga misuporta og naningkamot nga mapalambo ang maong parokya kay alang kaniya ang tanang kalamboan nga naangkon sa parokya dili iya, “inyo ni,” mao ni iyang pulong nga nakapatandog sa uban nga nakasabot sa iyang pagdumala. Gihatagan niyag libreng liturhiya ang mga PSL nga magamit niining bulan sa Hunyo sa kasaulogan sa Pulong. Adunay mga intermission number nga gipasundayag ang Sona 4,7,8, 11 og mga parish staff. Gipahitabo usab ang panagsabot sa mga PPC members og gikauyonan usab nga himoon kining binulan nga pagpasabot kabahin sa Revisiting the Yellow Book og ang Stewardship Formation sa mga formators kada sona ubos sa pagtugot og pagdumala ni Father Arnold.

Isip Parokyano ni San Roque naka-ingon mi nga nakaangkon mi og tinuod gayud nga piniyalan nga mao si Father Arnold Balaquinto.

Dalaygon ang Dios sa Kanunay!

(Arlene Tarnate | San Roque Parish SoCCom)