400 Ang Nakadawat sa Lawas ni Kristo

Mga 400 ka mga kabataan ang nakadawat sa Sakramento sa Unang Pagkalawat sa San Alfonso Ma. de Liguori Parish, Mandug niadtong Mayo 24, 2023. Kini ang unang higayon sa Unang Pagpangalawat sa parokya human ang makamatay nga pandemya sa COVID-19, rason nga grabe ang pagpangandam sa mga katekista nga gipangunahan ni Sr. Florita Galido, MIC ug iyang mga kaubanan nga mga Pangulo sa Pagpanudlo.

Gipahigayon usab ang recollection alang sa ilang mga ginikanan aron mas mapalalom pa ang ilang kaalam sa pagtulun-an bahin sa Sakramento sa Komunyon ug ang ilang tahas isip mga ginikanan.

Aduna poy mga unang pagkalawat sa nagkalain-laing GKK nga sakop sa parokya, hilabi na kadtong anaa sa mga lagyo nga dapit sama sa GKK San Isidro, Sitio Bonggan, Talandang, diin 9 ka mga kabataan ang nakadawat sa maong sakramento ug sa GKK Santa Catalina, Brgy. Katualan, Panabo City nga dunay 20 ka mga kabataan. Duna poy unang pangumpisal nga gipahitabo alang sa maong mga kabataan.

Sa homiliya ni Rev. Fr. Jemasol Ortiz, kura paroko, iyang gipahinumdoman ang mga ginikinan nga amumahon pag-ayo ang ilang mga anak. Ipahinumdom kanunay ang 10 ka sugo sa Dios hilabi na ang pagsimba sa Adlawng Igpapahulay kay ang dili pagsimba sala nga mortal. Iyang gihagit ang mga ginikanan sa pagbutang og 10 commandments sa ilang panimalay isip pahinumdom kanila. Iyang gitahasan ang mga ginikanan nga tabangan sa pagpasabot sa mga bata ang sakramento nga ilang nadawat.

Sumala pa ni Fr. Jojo, mao kini ang unang higayon nga nakapakalawat siyag daghan kaayo nga kabataan gikan sa nagkalain-laing primaryang tulunghaan sa Barangay Mandug. Nindot kaayo paminawon nga sa Misa mikanta mismo ang mga kabatan-onan nga minglanog ang tibuok simbahan sa mga awit sa kalipay ug kasadya.

Sumala ni Odessa Dominese, ginikinan, nga nalipay kaayo siya ug proud, hilabina nga nahuman ang maong aktibidad sa simbahan nga walay mga aberya. Dungag pa niya nga ilang paningkamutan isip mga ginikanan nga sa ilang pamilya masentro gyud ang Dios.

Sumala usab ni Eulogia Albacite, dako iyang kalipay nga nakita ilang mga anak nga nakadawat sa Sakramento sa Pagkalawat. Dugang niya nga isip ginikanan ilang nahimo ilang responsibilidad, uban sa panabang sa Espirito Santo. Nanghinaot siya tungod sa maong sakramento, mamahimong magkahiusa, magsinabtanay, magminahalay ug mahimong mahadlokon sa Ginoo ang ilang pamilya.

Alang ni Joyce Tinaco, usa ka adlaw una ang pagdawat sa sakramento, nagbasa na sila sa 7 ka sakramento sa Simbahan ug iyang gipasabot kung unsa ka mahinungdanon kini nga sakramento sa mga binunyagang Katoliko. Dugang niya nga isip ginikanan sila usab dapat mapahinumdoman kay sila mismo nakalimot na. Dapat sila mismo ang mag-agak sa ilang mga anak nga musimba kay karong mga panahona lisod ug dako kaayo nga hagit ang pagdisiplina hilabi na nga daghan silag matun-an online ug gikan sa ilang mga barkada. Dakong hagit kaayo ang ilang henerasyon karon kay alang kanila ang relihiyon o mga aktibidad niini sama sa pagdawat sa mga sakramento outdated or too traditional kanila.

Makita sa dagway sa mga ginikanan nga nitambong ug niduyog sa ilang mga anak ang walay puas nga suporta, ug kalipay nga nadawat na sa ilang mga anak ang usa sa pito ka mga sakramento sa atong simbahan. (Jomar Narciso | San Alfonso Ma. De Ligouri Parish SoCCom)