Mapasalamaton ug Malaumon

Dear Ate Emz,

Lisud ang kinabuhi, sama nakong ultimo ra uyamot. Padayon sa pagpangandoy nga makatagamtam og gamay’ng kaharuhay.

Pamilyado na ako ug ang akong kinamaguwangan nga anak, lalaki (20 yrs old), ug ang kamanghuran 15 yrs old, babaye, og ako, 50 years old na.

High school lamang ang akong nahuman tungod sa kawad-on. Sa kasamtangan, ang akong trabaho dili permanente. Construction worker, usahay mu extra sa pag-drive aron dunay dugang kita. Ang akong asawa naningkamot sab og kung unsay pwedeng pagkakitaan. Thankful lang sab ako kay ang akong mga anak nakasabot sa among sitwasyon. Kuntento ra kung unsay anaa. Pati ang akong asawa masinabtanon usab ug ako mapasalamatun niini. Usahay dunay mga away ginagmay pero dili magdugay. Bisan sa mga pagsulay, maka survive man gihapun sa adlaw-adlaw. Maayo kaayo ang Ginoo kay mabati gyud namo ang iyang presensiya. Wala kami niya gipasagdan. Duna gihapun mga sideline kung walay kontrata nga trabahoon.

Gani kining akong kamaguwangan maoy akong ka timbang sa pagpanarbaho. Gina-uban nako inig duna akoy trabahoon. Duna man sab akoy abilidad sa pagpang-ayo og mga guba nga appliances, wiring sa balay, pagpamanday. Akoa ra pud natun-an sa gidugayong pagpanarbaho sa construction. Ako pud gina hinay-hinay ipaambit sa akong anak ang akong natun-an, apan mas gustohon ko nga maka trabaho siya nga dili sama sa akong naandang trabaho. Mao nga akong ginapasabot kaniya ang importansiya ug makahuman sa pagto-on. Unta man lang sa akong mga anak ila kining maangkon aron mahimong mas molambo ang ilang kahimtang sa kinabuhi.

Hinaut unta,
Efren

* * * * * *

Dear Efren,

Ang tanan grasya sa Ginoo. Bisan unsa pa ang atong kahimtang sa kinabuhi, adunahan o kabus/ultimo, ang Ginoo nagbubo kanato og espesyal nga mga panalangin. Sumala sa imong sulat, imong gipadayag nga masinabtanon ang imong asawa, naningkamot sab siya nga naay mapagkakitaan, mga anak nga nakasabot sa inyong kahimtang ug kontento kung unsay naa, kung walay trabahoon, dunay mga sideline nga mapagkakitaan. Sa laktud nga pagkasulti, sa diha nga ang Ginoo mosira sa pultahan, ablihan sab Niya ang bintana. Busa, dili gyud mo gipasagdan. Ingon ani ang atong Ginoo molihok sa atong kinabuhi. Mohatag gyud na Siya og gasa aron ipakita Niya ang Iyang gugma ug pagpakabana kanato. Sakto gyud ang imong gipadayag nga mabati gyud ninyo ang Iyang presensiya!

Bulahan ka nga gigasahan ka sa atong Ginoo ug daghang kahanas sama sa imong gihisgutan nga mga abilidad sa pagpang-ayo og mga guba nga appliances, wiring sa balay, pagpamanday. Abi nimo, sa atong panahon karon nihit na gyud kaayo kini nga mga abilidad. Lisod na gyud kaayo makakita ug mga panday, kanang atong ma consider na “jack of all trades” nga mga indibidwal. Mao siguro nga dili gyud ka mawad-an og trabaho tungod niini nga mga abilidad! Salamat sa Ginoo ani nga mga gasa! Daku na kaayo ang imong matabang sa mga nanginahanglan sa imong serbisyo.

Kitang tanan naay kanya-kanyang giftedness, skills and talents. Kining imong abilidad, kung imong pamalandongan, mahimo kini nga imong misyon. Busa, kung ingon ani ang imong panglantaw, mahimong mahinungdanon ug makabuluhan ang imong mga buhat. And nothing is insignificant if you offer to the Lord all your endeavors, no matter how “lowly” they may seem. Ang imong mga paningkamot, pawis, kakapoy, etc., makahatag og kahupayan, solusyon sa problema sa uban pinaagi sa imong mga pagpang-ayo sa mga guba nga appliances, pagpamanday, etc. Di ba, kung makapaambit ka ug ginagmayng kalipay sa imong isigkatawo, malipay sab ka? Mao nga dili lang pangwarta ang mohatag og kalipay kanato apan labaw sa tanan, kinasing-kasing nga pagserbisyo. Mao kining kalipay ang dili mabayran sa kwarta, ug ma-consider na nato kini nga makapahimo kanimo nga espirituhanon nga adunahan pagkahuman sa tanan.

Maayo gyud nga imong gipa-ambit sa imong anak ang imong abilidad. Makadugang kini sa iyang mga mga kwalipikasyon sa ulahi kung siya makatapos sa iyang edukasyon. Nagtuo ako nga makalampus gyud siya sa iyang pag-tuon, salamat sa inyong ehemplo sa pagpaningkamot. Uban sa atong Ginoo, gigiyahan kamo Niya ug ibubo ang dugang mga panalangin sa inyong kinabuhi. Kapit lang, salig lang Kaniya, ug matuman gyud ang inyong mga pangandoy alang sa inyong mga anak.

God bless you more,
Ate Emz