Mabungahong Pagkinabuhi Isip Piniyalan sa ALP

“Ang pagkinabuhi isip usa ka piniyalan mao ang pagpadayag sa pagsimba sa nabanhaw nga Diyos”—mao kini ang tema sa ika-21 nga kapistahan sa katukuran sa Parokya sa Ascension of the Lord (ALP), Mayo 21, nga nahimutang sa GSIS Heights, Matina, Davao City.

Dose ka tuig na usab ang nakalabay sukad nga gi-sagop sa maong Parokya ang Spirituality of Stewardship nga sa pagkakaron mao ang gihimong over-arching goal alang sa tanang ministriya ug mga kapunungan sa simbahan.

Atol sa unang adlaw sa nobena alang sa kapistahan, Mayo 12, mao usab ang ika-21 nga kasumaran sa katukuran sa simbahan sa Ascension.

Kamatuoran nga gipuy-an sa mga parokyano sa Ascension Parish ang pagka-piniyalan mao ang katukuran sa Multi-Purpose Building nga proyekto nga gisugdan niadtong tuig 2018 ug napadayon luyo sa hagit sa pandemiya sa Covid 19.

Sa iyang sulat mensahe ngadto sa mga parokyano, gipadayag ni Rev. Fr. Zenon B. Ampong, kura paroko sa ALP, ang iyang pasalamat sa manggihatagon nga paghatag sa kaugalingon ug pinaagi sa aktibo nga ministriya ug nagkalainlaing mga apostolado, ug labaw sa tanan sa manggihatagong pagsuporta sa nagpadayon nga konstruksyon sa ALP Multipurpose Building.

Nadesisyonan nga magtukod ug ALP Multipurpose Building alang sa mga dagko nga kasaulogan, ingon man isip evacuation area panahon sa kalamidad, tapokanan sa mga relief goods, sports events ug daghan pang uban.

Bisan pa man nga wala pa hingpit nga nahuman ang maong ALP Multipurpose Building, nagamit na kini sa unang higayon alang sa kasaulogan sa anibersaryo sa Stewardship niadtong Disyembre 4, 2022, Bihilya alang sa Blessed Sacrament sa Biyerness Santo, ug Sugat sa milabay nga kasaulogan nga Pasko sa Pagkabanhaw ug Pastoral Assembly.

Human sa seremonyas sa pagbendita sa matag haligi sa simbahan isip kasaulogan sa katukuran sa simbahan sa ALP, gipahigayon ang Youth Night sa ALP Multipurpose Building diin gihimo ang programa alang sa mga kabatan-onan gikan 36 ka mga GKKs.

Gawas sa mga kabatan-onan, nakigtambayayong usab ang mga barangay sa Matina Crossing ug Pangi sa pagpadala sa mga myembro sa Senior Citizens Chapters nga nahisakop sa Parokya alang sa Seniors Day sa hapon sa Mayo 13, adlawng Sabado sa ALP Multipurpose Building gihapon.

Gitakda sa Mayo 13 ang Kumpil alang sa mga hamtong ug kabataan nga gipanguluhan ni Most Rev. Romulo G. Valles, DD, Arsobispo sa Dabaw.

Adlawng Domingo, Mayo 14 nakigtambayayong ang Parokya sa barangay sa Pangi alang sa pagpahigayon ug medical mission nga gipanguluhan sa Parish Social Action Ministry alang sa libre nga medical check-up, dental, blood typing ug uban pa.

Nanghinaut si Fr. Ampong nga ang tema ning tuiga, “Steward, let your lifestyle be an expression of your worship to the Risen Lord,” magdala sa katawhan ngadto sa mas halawom nga pagsaksi isip nga mga nagapanaw nga mga Stewards kinsa makahuluganon nga nakadawat, manggihatagong nagpa-ambit, ug nagtubo diha sa pagtoo sa panawagan sa Diyos alang sa pagbag-o ug mamahimong mga instrumento sa kabag-ohan pinaagi sa Misyon sa Binunyagan.

Gitakda ang panagtapok sa mga ministriya sa Mayo 19, prosisyon sa Mayo 20, alas 5 sa buntag nga pagasundan sa Santos nga Misa, ug sa adlaw sa Kapistahan sa Mayo 21, ang kasaulogan sa Santos nga Misa sa alas -7 ang takna sa buntag nga pagapanguluhan ni Most Rev. Romulo G. Valles, DD.

Saulogon ang Pista sa Parokya sa Mayo 21,gikan alas-10 sa buntag kutob alas-3 sa hapon sa tanang mga GKK Servant Leaders, nga mga piniyalan usab ug sa tanang nakighiusa sa ika-21 nga Kapistahan sa ALP.

Dungan usab sa Pista sa Parokya, adunay mga sports events nga gihan-ay ang GSIS Homeowners Association sa adlaw sa kapistahan.