Batan-ong Mananabtan

Isip usa ka magtotoong Katolikong Pilipino, ang bulan sa Mayo usa sa mga panahon diin atong gitagaan ug pasidungog ang atong Mahal nga Inahan nga si Birhen Maria. Busa aduna kita’y mahimamat ug ila-ilahon nga deboto kang Birhen Maria.

Si Dennis Dollete, Jr. o nailhan usab nga si JBoy, usa ka youth nga usa usab ka gift bearer sa Our Lady of Fatima Parish sa Boulevard, Davao City. Gawas niini usa pud siya ka mananabtan. Kasagaran sa mga mananabtan nga atong nahibaw-an mga hamtong, nag edad ug 60 anyos pataas.

Si Jboy, 17 anyos pa karon ug 10 katuig na siyang mananabtan sa ilang GKK nga ang patron ang Birhen sa Fatima. Matod pa ni JBoy, ang pagkamananabtan, usa ka katungdanan sa kinabuhi sa pagpanguna sa pag-ampo sa novena ilabina sa pag-ampo sa Santos nga Rosaryo. Sa una, dili unta niya gustong mahimong usa ka mananabtan apan gihatag kini sa Dios kaniya. Nagsugod ang iyang pagkamananabtan tuig 2013 tungod gisugo siya sa mga tigulang sa ilang GKK nga mag-ampo sa Santos nga Rosaryo ug sa novena kay wala may mangadye atong adlawa.

Para kang JBoy kinahanglan nga i-ampo ang uban kay kinahanglan kini nila. Isip usa ka mananabtan, iyang gisalig sa Dios ang iyang kinabuhi. Angayan lang nga iagi ang atong mga pag-ampo sa atong Inahan nga si Maria kay wala wala pa gyud dungga nga may usa nga midangop sa iyang panalipod, nangayo sa iyang panabang ug pangaliya sa pagpangama nga iyang gibiyaan. Isip nga inahan ni sa atong Ginoo, iyang dad-on ang atong mga pag-ampo kang Hesu Kristo.

Si JBoy malipayon nga siya nagaampo alang sa uban kay para kaniya usa kini ka grasya gikan sa Dios ug kini iyang ihatag ug balik sa Dios nga libre ug walay bayad. Tungod sa iyang pagkamananabtan, aduna siyay personal nga relasyon kang Maria ug pinaagi niini naduol siya kang Hesu Kristo. Dili siya mahimong mananabtan kung dili siya deboto ni Maria.

Gidasig ni JBoy ang mga kabatan-onan nga sama niya nga kanunay mag-ampo ug manguna sa pagampo sa Santos nga Rosaryo ug novena. Dili kini angay ika-ulaw kay kini alang sa labaw nga himaya as atong Ginoo. (Bro. Ignatius Gonzales, CFA)