Ang Espiritu Santo

Solemnidad sa Pentekostes (May 28, 2023)
Acts 2:1-11 / Ps. 104:1, 24, 29-30, 31-34 / 1 Cor. 12:3b-7, 12-13 / Jn. 20:19-23

Unya si Jesus miingon kanila pag-usab, “Mainyo ang kalinaw. Ingon nga gipadala ako sa Amahan, ako usab nagpadala kaninyo.” Gisulti niya kini ug unya gihuypan niya sila ug giingnan, “Dawata ninyo ang Espiritu Santo”.

Si Jesus misaad sa pagpadala sa Espiritu sa dihang Siya wala na. Ang Espiritu mosaksi sa Iyang kamatuoran ug mogiya sa mga disipulo ngadto sa kamatuoran. Kini tungod kay ang Espiritu mosulti lamang mahitungod sa kamatuoran ni Jesus. Ang Espiritu mokuha gikan kang Jesus ug ipahibalo kini ngadto sa mga disipulo ni Jesus agig balos. Si Jesus sa pagbalik ngadto sa Amahan dili mobiya niadtong Iyang gihigugma isip mga ilo. Dili sila mag-inusara. Usa ka Magtatabang ang ipadala aron mahimong magpabilin nga presensya ni Jesus ug sa Amahan sa mga kasingkasing sa tanan nga mituo Kaniya.

Karon, ang Espiritu usa ka makapahupay nga presensya. Dili kini mag-imbento ug bag-ong mga pagtulon-an kondili magpahinumdom lamang kanato sa gitudlo ni Jesus kaniadto. Kini Espiritung mapadayunon. Busa kahibulongan nga ang pipila ka mga tawo nangamuyo sa awtoridad sa Espiritu sa pagbuhat ug bag-o ug katingad-an nga mga pagtulon-an. Ang Espiritu ni Jesus wala magbahin sa mga magtotoo. Ang tinuod nga timaan sa tinuod nga Espiritu ni Jesus mao ang pagpadayon sa Iyang mga pagtulon-an. Ang Espiritu usab naghiusa sa mga magtutuo ngadto sa usa ka komunidad nga naminaw ug nagsunod sa mga pagtulon-an ni Jesus.

Hinaot nga kanunay natong huna-hunaon nga ang Balaang Espiritu nga nadawat sa mga apostoles kaniadto, maoy nagpadayon ug nagtapos sa buhat ni Jesus. Ang Espiritu mogiya, mohupay, magtudlo, ug manalipod kanato samtang kita magpadayon sa pagpanaw ngadto sa balay sa Amahan. (Bro. Ranieboy Pamplona)