Tingog sa Magbalantay

Ika-4 Domingo sa Pasko sa Pagkabanhaw (April 30, 2023)
Acts 2:14A, 36-41 / Psalms 23: 1-3a, 3b, 4, 5, 6 / 1 Peter 2:20B-25 / John 10:1-10

Si Kristo Jesus ang maayong magbalantay. Gipadayag ni Jesus ang iyang kaugalingon isip usa ka maayong magbalantay sa panon sa dihang Siya miingon “kon pagawason Niya ang tanan Niyang karnero, mag-una Siya kanila ug ang mga karnero mosunod Kaniya tungod kay nakaila man sila sa Iyang tingog.” Kining maong pasumbingay ni Jesus nagpunting sa Iyang pagka-maayong magbalantay tungod kay Siya mao ang nag-una kanato sa dalan nga agianan paingon sa Amahan. Siya nga nagtuman sa kabubut-on sa Amahan, bisan tuod Siya Dios apan wala Niya isapayan, apan Siya nagmasinugtanon hangtod sa katapusan, bisan pa man sa kapait, kalisod, kangil-ad ug kaulaw apan giantos Niya ang tanan tungod og alang sa kaluwasan. Kini nga kalidad ang matuod nga maayong magbalantay, andam motahan sa kaugalingon sa tanan.

Diha sa atong Ebanghelyo si Jesus miingon “Ako ang pultahan.” Kini nga paghulagway adunay lawom nga kahulogan. Walay laing agianan, gawas kang Kristo Jesus, ang maayong magbalantay paingon sa Amahan. Diha sa laing bahin sa kasulatan nag-ingon, walay makaadto sa Amahan kon dili moagi kang Jesus (Jn 14:6). Ang tanan nga moagi Kaniya makakaplag ug kinabuhi. Usa ka hagit kanatong Iyang mga sumusunod nga naglambigit sa dakong responsibilidad sa matag-usa. Usa ka pagtahan sa kaugalingon nga dili ang kaugalingong kahimayaan ang tagbawon kondili ang paghatag sa kaugalingon alang sa uban. Ang paghatag sa kaugalingon nga mapaduol ngadto sa balaang kasingkasing ni Jesus ug dili sa atong tagsa-tagsa ka mga gagmay’ng kasingkasing. Mapaduol ngadto sa kasingkasing ni Jesus nga puno sa gugma ug andam nga mohatag sa tanan.

Apan sa laing bahin, mahimo lamang nato kining tanan kon aduna kitay dakong paghigugma ngadto kang Jesus kinsa mao ang maayong magbalantay. Atong himoon nga mahisama ang atong tagsa-tagsa ka mga kasingkasing sama sa kasingkasing ni Jesus nga andam motahan sa tanan. Ang pagkamaayong magbalantay nagsukad diha gayod sa dakong relasyon sa Dios nga diin iyang gihigugma sa naghingapin ug iyang gipakita diha sa iyang kinatibuk-an nga kinabuhi. Kini mabatian sa tanan nga naminaw kanato nga kita wala lamang nagsulti sa atong kaugalingon apan sa atong gibarogan nga mao si Kristo Jesus, ang maayong magbalantay.

Sa katapusan, ang pagkamaayong magbalantay usa ka tawag sa matag-usa kanato. Kita gipahinumdoman sa gipiyal kanato sa Dios nga mahimong responsable ngadto sa atong mga igsuon. Atong paminawon kanunay ang tingog sa maayong magbalantay aron dili kita malingla sa tingog sa tigpaka-aron-ingnon. Ato pa gayod nga palawman ang pag-ila sa tingog sa maayong magbalantay aron kon ugaling adunay gustong mosundog niini, mailhan nato ug dili kita masulod sa laang. Ato gayod nga isalig ngadto Kaniya ang tanan kay Siya miingon man “Ang mosulod pinaagi kanako maluwas.” Kining maong saad ni Jesus maoy atong huptan isip buhing timaan sa paglaom nga sa kaulahian, ang Dios maghingpit sa tanang mga butang. (Bro. Soren Abellanosa)