Giunsa Nimo Pagpangandam?

Ang atong pagsaulog sa Panahon sa Kwaresma matapos na niining Semana Santa nga atong giablihan karon, Domingo sa Pasyon sa atong Ginoo. Partikular kining matapos karong Huwebes Santo sa pagsalop sa adlaw. Ang mosunod nga mga oras, Huwebes sa gabii hangtod na sa Adlaw nga Domingo sa Pagkabanhaw sa atong Ginoo mao na ang “Paschal Triduum” nga mao ang paghandum sa mga katapusang adlaw sa atong Ginoo.

Ang atong Arsobispo sa Davao, Most Rev. Romulo G. Valles, D.D., nagpahimangno nga “kining mga last days of Lent, kining particular nga yugto sa kinabuhi sa atong Ginoo katong iyang pasyon, iyang pag-antos, kamatayon ug pagkabanhaw, mao na ang atong gipangandaman.”

Gipasabot sa Arsobispo nga ang kwaresma, isip pagpangandam, usa ka estilo sa kinabuhi. Sulod niini nga pagpangandam hangtod Huwebes Santo, “dunay mga Lenten retreat, dunay mga pakumpisal, pila ka Domingo na, unom ka Domingo apil karon, sugod sa bolibod sa abo, paghuman ana ready na kita gyud, pure kaayo mouban kang Hesus. Pagkagabii, iyang gibilin ang Eyukaristiya, ‘buhata kini sa akong handumanan’, ‘kining pan mao ang akong lawas’, ‘kining bino akong dugo’, mao nga mo-entra nata ana.”

Giawhag usab ni Arsobispo Valles nga sa panahon sa “Visita Iglesia”, angayan nga ang mga ginikanan modala ug mopasabot sa mga kabataan sa kahulogan sa Santisimo Sakramento, ang Lawas ni Hesukristo nga gisimba diha sa giandam nga nindot nga tabernakulo.

Iya usab nga gihagit ang katawhan nga molambigit sa mga kalihukan sa Biyernes Santo uban ang paghalad panahon sa kolekta alang sa atong mga kaigsuonan didto sa Holy Land. Walay himuon nga paghalok ug paghikap atol sa pagsimba sa Balaang Krus. Mahimo lamang nga mopadayag sa pagsimba pinaagi sa pag “genuflect” o “bow”.

Gipahimangno usab niya nga dili kita mopugong niadtong mga moadto sa mga bakasyonan aron mopahulay panahon sa gitawag nga “long weekend”. Apan matod niya nga “dili kini maoy tuyo sa paghimo nga holiday to respect the mysteries.”

Dugang niya nga, “this special time of the Easter Triduum, meaning tulo ka adlaw nga paghandum sa iyang passion, death and resurrection, ang character niya is communal.” Busa angayan lamang nga makig-uban kita sa duot sa mga magtotoo niining tulo ka importanteng mga adlaw.

Bisan siguro usahay mabati nato nga gubot, samok ang pag-apil uban sa daghang mga tawo, matod sa Arsobispo nga “mao man kini ang atong pamilya uban ang mga weak, mga samukan. Unya kung tua ta didto makatabang ta nga ang tanan makaampo.”

Awhag niya nga “ikaw mohatag og example, motabang ka didto, Katoliko man ka, motabang ka didto nga manindot ang atmosphere.”