Ang Kabililhon Sa Usa Tawo Nga Kasaligan

Kasaligan ka ba?

Lisod diretsohon og tubag kining maong pangutana. Lisod tubagon tungod kay magdala kini kanimo sa pagtan-aw o pag-eksamen sa imung kaugalingon diha sa daghang aspeto sa kinabuhi nga magtug-an ug magsutli kanimo kung kasaligan ka ba o dili. Gikinahanglan usab nga mahibal-an ang pagkatinuod niini nga kinaiya diha kanimo pinaagi sa gisulti sa ubang tawo mahitungod sa imung gipakita nga kinaiya didto kanila.

Ang inspirasyon niining maong pangutana mao ang atong pagpamalandong mahitungod sa pagkamaayo nga magbalantay sa katawhan sa Dios. Ug ang tumong mao ang paghagit sa matag-usa kanato sa pagpamalandong sa atoang tagsa-tagsa ka mga kinaiya diha sa natad sa pagkamaayong magbalantay.

Tinuod nga kanunay kitang makadungog nga bililhon gayod ang usa ka tawo nga kasaligan sa daghang mga butang. Ang kadaghanan misulti nga bililhon ang kasaligan nga tawo tungod kay siya maalamon ug tinuod sa iyang mga pulong ug maayo sa iyang mga buhat. Bililhon kining tawhana tungod kay siya kasaligan diha sa tahas o rolyo nga gisangon kaniya sa iyang trabaho, pamilya, komunidad, o sa simbahan. Bililhon usab siya tungod kay kasaligan diha sa iyang matag-adlaw nga pagkinabuhi uban sa katawhan nga nagapalibot kaniya. Mas labing bililhon kining tawhana tungod kay kasaligan siya diha sa iyang pagtoo sa Dios. Makita nga lig-on ang iyang pagtoo ug nagpuyo nga balaan sa kinabuhi. Bililhon siya tungod kay maayo kanunay ang iyang pangandoy, tinguha, ug panglantaw sa kinabuhi nga magdala usab ug kaayohan sa tanan.

Kung kining gisulti sa katawhan mao ang mga basehanan sa pagkamaayo nga magbalantay, ikaw ba makatubag na sa maong pangutana: kasaligan ka ba?

Sulod sa 23 anyos nga pagkinabuhi isip pari sa simbahan, ako usab dili makadiretso ug tubag niining maong pangutana tungod kay daw susama nga wala pa akoy dakong katakus sa pagsulti nga ako usa na ka maayong magbalantay. Maglisod usab sa pagsulti nga miabot na ako diha sa taas nga ang-ang sa akoang pagkamaayong magbalantay. Adunay kalisod tungod kay sa matag tubag nako niining maong pangutana, madala usab ako sa paghinumdom ug pagpamalandong sa akoang limitasyon ug kakulangan sa kaugalingon. Anaa gani’y panahon nga akong dad-on diha akoang pagka-dili takus nga pagkapari sa simbahan. Tinuod nga daghan ang nagsulti kanako dinasig sa unsa ang ilang nakita ug nasinati uban kanako nga ako naningkamot diha sa pagpuyo nga sulondon ug maayo nga magbalantay sa katawhan. Pinaagi niini, ang akong ikasulti mao nga klaro kaayo kanako nga ako naningkamot lamang, uban sa grasya, panalangin ug kalooy sa Dios, sa pagpuyo nga sulondon sa Kristohanong kinabuhi uban sa katawhan ug mamahimo nga sulondon diha sa akong pagkakapari sa simbahan.

Sa kasamtangan, ang akong kasinatian isip usa ka seminary formator sa Regional Major Seminary of Mindanao ug sa akoang pagka Vicar for the Clergy sa Diocese of Mati nakapadugang sa akoang kadasig sa pangpaningkamot nga mamahimo nga sulondon diha sa natad sa pagkamaayong magbalantay.

Ako kining gipaningkamotan nga mamahimo ug mahitabo dinhi nga aspeto sa kinabuhi.

Una, sulondon diha sa kinaiyang Diosnon. Naningkamot nga mapakita ang pagka-mainampoon, pagpuyo nga balaan, ug kanunay nagasalig sa hinabang, grasya ug kalooy sa Ginoo. Ako adunay dako nga pagtoo nga walay kapuslanan ang pagpaningkamot kung kini dili ihalad ngadto sa dakong kalooy sa Ginoo. Ako makapamatuod nga, “Ang tanan adunay grasya, kung ang tanan isalig sa grasya sa Dios.” Mao nga kung kita maningkamot sa pagkinabuhi nga Diosnon, aduna gayod kini madawat nga Diosnong grasya ug Diosnong kalooy.

Ikaduha, sulondon diha sa maayong kinaiya ug pamatasan. Sigon sa panultihon, “You cannot give what you don’t have.” Tinuod gayod! Kung batonan nato ang pagkamaayo diha sa kinaiya ug pamatasan, mas kusog ug dali kini makatakod sa ubang tawo nga nakapalibot kanimo. Mas lalom ang epekto kung matakdan sila pinaagi sa pagkamaayo sa kasingkasing kaysa pinaagi sa maayong pulong lamang. Ug mas makatakod kini, kung kini ang kanunay nga makita nga gipaningkamotan nga mapoy-an sa kaugalingon.

Ikatulo, sulondon diha sa pagkinabuhi nga simple o dili luho ug sulondon sa pagkamaloloy-on. Ingon pa sa panultihon, “maglisod ka sa pagtagad sa panginahanglan sa mga tawo kung ikaw mismo wala matagbaw sa pagtagad sa panginahanglan sa kaugalingon.” Ang usa ka timailhan sa pagkamaayong magbalantay mao nga siya nagpuyo nga simple sa kinabuhi ug dako kaayo ang iyang pagtagad sa panginahanglan sa uban. He or she is always a man or woman of good will. In the Gospel of St. Matthew 9:36, we can find this captivating description about Jesus when it states, “When he saw the crowds, he had compassion for them, because they were harassed and helpless, like sheep without a shepherd.” Si Jesus usa ka tinuod nga maayong magbalantay tungod kay siya adunay dako nga kalooy sa iyang katawhan. Susama ni Hesus, kita maningkamot nga mamahimo nga maayong magbalantay diha sa pagkinabuhi nga simple ug sulondon diha sa dakong kalooy alang sa katawhan sa Dios.

Kasaligan ka ba? Kung ikaw kasaligan, ikaw usa ka bililhon nga tawo sa pamilya, Katilingban ug sa simbahan. Padayon kitang motubag niining maong pangutana diha sa matag-adlaw nga pagpaningkamot uban sa kalooy ug grasya sa Dios. (Fr. Edilberto R. Mahinay)