Second Chance

Dear Ate Emz,

Ako na lang gitulon ang akong pride ug kaulaw aron lang makapaambit aning akong kasinatian tungod kay nagtoo ako nga makahatag kini og pagtulon-an sa mga sama nako nga nalulong o nagasugod pa lang sa pagsugal.

Kaniadto man gud nahilambigit ako sa bisyong sugal. Sa sinugdanan past time lamang ug hangtud sa nahimong bisyo. Dili kumpleto akong adlaw kaniadto kung dili maka sugal. Ginagmay pa ang pusta hangtud sa nagkadugay nagka dako na sab ang involved nga kwarta. Hangtud sa mahurot ang kwarta, mga kabtangan na ang ipusta. Ang worst pa gayud kay mangawat na sa akong Mama ug Papa aron lang nga dunay ikapusta.

Taud2x sab ako nga na lulong sa maong bisyo. Gani kung wala pa lang nahitabo ang usa ka trahedya sa akong kinabuhi magpahangtud karon sugal gihapun ang atubangon. Nahunong lamang kini sa higayon nga hapit ako namatay tungod sa sugal. Nagka-utang-utang ako ug dako nga kantidad sa akong mga higala nga mauy hinungdan sa ilang pagka dismaya kay gitakasan ko ang akong obligasyon kanila.

Gipapangita ako aron singlon ug gihulga nga kulatahon kon dili nako ma settle akong mga obligasyon. Maayo na lang akong napangitaan ug paagi pinaagi sa akong higala nga medyo dunay kaya. Iya akong gitabangan nga masulbad ang tanan. Iya akong gitambagan nga undangon na ang dili maayong binuhatan. Way pagduha-duha akoa dayun nga gibiyaan. Usahay maka huna-huna ako ug mubalik sa pagsugal apan akong nahinumduman ang kamaayo sa GINOO pinaagi sa iyang instrumento diha sa usa ka hulagway sa pagkatao sa akong higala nga makapahinumdum sa akong hiwi nga binuhatan.

Salamat sa 2nd chance nga ako nabag-o ug padayun sa pagbag-o.
Tatang

* * * * * *

Dear Tatang,

Daygon ug pasalamatan ang atong Ginoo niining imong kadaugan. Ako lang ma imagine nga daghang pakigbisog ang imong naagian aron lang mahunong kini nga bisyo nga imong gisudlan.

Nahinumdom ko sa akong kaila nga sama nimo, nalambigit usab sa sugal apan sa on-line game ug sabong ang iyahang bisyo. At first, nakadaog siya sa pipila ka higayon ug mao nga mas nadasig siya sa pagpusta. Unya, samtang nagpadayon ang dula, nagsugod na siya og kapildi. Ug sa sulod sa usa lang ka adlaw, nakautang siya og P180,000.00 sa iyang financer! Kini nga utang naay interest na P20,000.00 kada bulan. Ang pinakapait pa gyud mao ang kahimtang nga wala siya’y trabaho. Ug dili siya makaikyas kay gihatagan na siya og ultimatum nga kinahanglan mabayaran niya ang tibuok kantidad sulod sa 3 lang ka bulan. Sama nimo, nameligro ang iyang kinabuhi tungod kay nakadawat siya og mga hulga, ug matag karon ug unya, makadawat siya og tawag nga dapat magbayad na siya. Daghan siyang giapproach nga mga higala bahin sa iyang problema apan napakyas tungod kay wala sila nakatabang kaniya. Last recourse mao ang iyang paryente nga kaniadto nitabang ug nagasuporta sa iyang pag-eskwela. Salamat sa Ginoo, tungod ani niya, nabayaran ang tibuok nga kantidad. Ug karon, kining iyang paryente gihinay-hinayan niya og bayad sa kantidad nga gitapal sa iyang nakompromiso sa sugal.

Sa pagkatinuod lang, sama sa kining akong nahisgutang kaila, pinaagi sa mga tawo nga gipadala sa Ginoo nga nitabang kaninyo, dinhi nimo maamgohan kung unsa ka dako ang Iyang pagtagad kanimo, bisan pa unsa ka layo sa imong pagkahisalaag sa imong panaw sa kinabuhi. Bisan pa sa unsang pamaagi gipaabot ang “singgit sa Ginoo” alang kanimo…gitawag gyud ka nga mobalik Kaniya pinaagi aning kasinatian. Hence, you have learned your lesson, although, in the most expensive way.

Pagtrabaho pag-ayo alang sa salapi nga moabot kanimo. Ayaw pagsalig sa swerte, hinuon, magmaalamon ug magmalahutayon sa imong mga paningkamot aron mahimong mabungahon kini.

Karon nga nagpadayon ka sa imong bag-ong higayon sa kinabuhi, ang yawa molihok na usab og double time aron mabawi ka sa imong daan nga bisyo. Mao nga kinahanglan nimong armasan ug panalipdan ang imong kaugalingon sa hingpit ug makanunayong pag-ampo. Hence, stay strong and always guard yourself against the manipulations of the evil one. Remember the words of St. Pedro Poveda… “Prayer is our only strength”. Stay strong and always guard yourself against the manipulations of the evil one.

Ayaw gyud pagbiya sa imong pagkapyot sa Ginoo kay dili gyud ka Niya biyaan bisan pa unsa ka kusog sa tentasyon. Naa ang Espiritu Santo nga mogiya kanimo sa dalan sa imong pag bag-o ug magbubo sa mga gasa nga imong gikinahanglan aron mabuntog ang bisyo nga imong gipaningkamutan nga undangon ug biyaan. Ang paglikay sa mga okasyon o mga tawo kung asa kusog ang bira sa bisyo mao ang usa sa mga lakang nga imong mahimo aron magpabilin ka nga lig-on sa imong determinasyon sa pagsubay sa hustong dalan.

Remember God loves you and cares for you that is why He does not want you to be totally destroyed as a person.

Nagtuo ako nga kining imong kasinatian makatabang ka sa mga batan-on labi na sa mga adik sa bisyo, ma on-line man o live/face-to-face. Hinaot unta nga ang imong mga pakigbisog magpadayon ug daghan pa ang imong ma-inspire sa imong mga maayong buhat, kauban sa pag giya sa atong Ginoo, ug ang atong Mahal nga Inahan kanunay manalipod kanimo.

God bless you more,
Ate Emz