Redemptorist Youth naghiusa alang sa “Care for the Earth” Project

Ang pagpananom og kahoy usa ka importanteng bahin sa pagpreserbar sa kinaiyahan. Ang mga kahoy kinahanglanon alang sa kinabuhi. Ang pagpananom og mga kahoy makatabang sa pagpamenos sa epekto sa kausaban sa klima ug polusyon sa hangin.

Ang Parokya sa Inahan sa Kanunay’ng Panabang (OMPH), gipangunahan sa Parish Social Action Ministry (PSAM), inubanan ni Padre Bonn Baretto Cssr., ug sa mga Kabatan-onan sa Redemptorist Youth Ministry (RYM-Davao) Volunteers hiniusang nagtanom para sa Care for the Earth project “Tree Planting/Care Activity” sa Arkidayoses sa Dabaw. Mao sab ni ang tubag sa Encyclical ni Santo Papa Francisco nga “Laudato Si”. Kining kalihukan gipahigayon sa Sitio Tabak, Brgy. Tawantawan, Baguio Dist., Davao City niadtong Sabado Pebrero 25, 2023 sa buntag.

Ania sa 147 seedlings ang ilang mga gipananom ug nahimo kining nagmalampuson maski sa kainit sa adlaw. Pinaagi sa mga kalihokan sama sa pagpananom og kahoy, matuman nato ang atong mga katungdanan isip mga tinugyanan sa Mother Earth ug nakahimo kita og lakang paingon sa kalamboan sa umaabot nga kalibutan. (Mary Grace Gonzales | OMPH Soccom)