Pagpangandam Sa Pakig-Uli Kay Kristo

Isip pag-abli sa Kwaresma gipahigayon sa tanang Katolikong Simbahan ang Miyerkules sa Badlis kon Ash Wednesday niadtong February 22, 2023. Gihimo ang pag badlis sa agtang sa mga matoohong katoliko sa St. Mary of the Perpetual Rosary Parish, Buhangin sa alas 6:00 sa buntag ug sa alas 5:30 sa kahapunon nga gipangulohan sa kura paroko, Rev. Fr. Dionisio Tabiliran.

Matod pa ni Fr. Diony Tabiliran nga mao kini ang sinugdanan sa kwaresma diin sa kwarenta ka adlaw si Hesus nakahiagom ug kalisod, kasakit og sakripisyo hangtod nga siya gilansang sa krus ug namatay. Dugang gipasabot ang 3 ka buluhaton sa kwaresma: Almsgiving, Sacrifice and Holiness.

ALMSGIVING: Kita mamahimong modelo sa pagka-manggihatagon sa uban ilabi na ngadto sa mga nanginahanglan, pagtabang sa mga nagkalisod. Mamahimo kitang maayong piniyalan ni Kristo Hesus diha sa paghatag og hustisya ug kaangayan sa atong isigka-ingon labi na sa mga nahikawan. Kini mahimo usab pinaagi sa ALAY KAPWA diin kini gipahigayon aron sa pagduaw sa mga panimalay sa paghalad og pag-ampo.

SACRIFICE. Pag sakrispisyo sa mga naandang gimbuhaton, mga nagkalain-laing bisyo, mga kahilayan ug dili lamang kini nag punting mahitungod sa pagkaon kon dili sa tanang butang nga atong naandan nga mamahimong makatabang sa atong pagka matinud-anon sa pag pangandam niining panahon sa Kwaresma. Usa usab ka lakang aron sa pag balaan mao ang pagpuasa ug pagpugong sa pagkaon.

HOLINESS. Kini gipasabot nga niining panahon sa Kwaresma atong sination ang kanunay nga maampoon ug ang hingpit nga paghinulsol sa atong mga kalapasan nga nabuhat ug atong mapamalandongan ang tinood nga tumong sa Pasyon ni Kristo Hesus.

Sulod sa kwaresma giawhag kita sa pagmata sa tawhanon nga mga buhat ug sa mga kalapasan nga mao ang hinungdan nga Iyang nasinati ang mga kalisod, kasakit nga natagamtaman ug ang pagtimaan kaniya pinaagi sa Krus nga natuman niya ang sugo sa Amahan nga mao ang pagluwas kanatong mga katawhan. Buot ni Kristo nga atong mahibaloan ug masinati kung unsa ang tumong sa iyang pagpasakit aron diha kita makaamgo sa atong pagtalikod, panamastamas ug paglapas sa mga sugo kaniya. Kita unta motoo sa mga pulong diha sa ebanghelyo ug mahibalik kita kaniya. Kining panahona nag imbita kanato sa pagsunod kang Kristo Hesus diha sa atong panon sa pangalagad.

Sa katapusan, kita gipahinumdoman kung unsa ka dako ug walay kinutuban ang GUGMA ni Kristo Hesus kanatong mga katawhan, angayan lamang kita sa pagbuhat og maayo ug maglikay sa pagpakasala aron angayan kita sa prebelihiyo nga iyang gihatag kanato sa atong pagkinabuhi ug sa iyang sakripisyo sa pagpasakit ug kamatayon alang kanatong tanan. (Arsenio H. Berdera, Jr. | GKK SoCCom)