Love Serves

Niadtong Marso 21, 2023 natagaan kita sa dakong pribilehiyo nga mahimamat ug makahinabi ang usa sa mga chaplains nga dinhi sa dakbayan sa Davao naka destino. Usa na niini si Rev. Fr. Rhoeden V. Regalario nga mao ang chaplain sa District XI Philippine Coast Guard. Si Padre Rhoeden gitawag pud og Lieutenant Senior Grade isip usa sa mga opisyal. Sa iyang baynte ka tuig nga pagkapari, siya nalipay pag-ayo nga naka hatag diha sa iyang serbisyo isip chaplain sa PCG.

Tuod man didto siya gikan sa Diocese of Caceres sa Naga, wala niya gihikaw ang iyang kaugalingon nga muabot sa laing mga luna nga nagkinahanglan sa iyang panabang. Sa pagbisita sa relikya ni Sta. Teresita sa Batang Jesus, dako ang iyang kalipay, tungod kini nga pagbisita mipuno sa iyang kasinatian, tungod sa mga miagi naka saksi man sab siya. Tuod man kaniadto usa pa siya ka seminarista ug gani usa siya sa mga mipas-an sa maong relikya.

Sa pagkakaron, bisan tuod ika-lima na niya kini, duna siya’y espesyal nga pangaliya alang sa iyang igsuon nga muagi sa dakong operasyon. Dako man ang iyang kabalaka apan mas dako ang iyang pagsalig sa gahom sa Dios labi pa nga iya usab nga makaplagan ang mga parte sa lawas ni Sta. Teresita.

Usa sa mga dili niya makalimtan bahin niining batang santos, ang iyang motto, nga LOVE SERVES. Dinhi sa iyang trabaho karon konkreto kaayo niyang napadayag, napuy-an ug nasabtan kini nga mga pulong tungod kay dakong gugma gayod ang iyang gikinahanglan sa pagatubang sa lainlaing mga panginahanglan sa mga coastguardians.

Nanghinaot siya nga ang mga mubisita ug maghalad sa ilang pag-ampo kang Sta. Teresita, makakaplag diha sa tiunay nga gugma, nga sa matag lihok ug akto mamahimo kining usa ka dakong halad sa gugma.