Karon Kasabot Nako

Dear Ate Emz,

Maayong adlaw sa tanan mga ka kwentuhan.

Akong mahinumdoman nga sa una grabe ko masuko sa akong Mama tungod sa rason nga dili ako tugutan nga mulaag kauban ang akong barkada bisan lang sa mall o sa balay sa akong classmate. Duna akoy time limit nga kinahanglan makauli na dayun gikan sa eskwelahan. Mapungot ako pagayo kay ako ra ang wala sa panon. Mahibaw-an ko na lang nga nag-enjoy sila sa ilang lakaw. Pila na ka beses nga left out gyud ako kay lagi over protective kaayo akong inahan. Wala na man gud akoy amahan nga mapananghiran.

Sa gidugayon nga panahon nga ako na ang anaa sa sitwasyon, karon nga naa na koy duha ka anak (15 ug 10 anyos) ako na sab nga gibati ang gibati sa akong inahan kaniadto. Nasabtan ko na karon nganong protective kaayo siya nako kay tungod atong mapanalipdan ug mahilayo sa mga kakulian ang mga anak.

Cycle lang ang tanan ug husto gayud ang atong mga ginikanan kay matud pa Mothers know best.

Salamat gayud sa akong inahan sa iyang pamaagi nga ako mapanalipdan.

Mai-Mai

* * * * * *

Dear Mai-Mai,

IT TAKES ONE TO KNOW ONE…

Dili lalim ang katungdanan sa mga ginikanan dinha sa ilang mga anak. Labi na gyud ang mga inahan. Gikan pa sa pagsabak nagsugod na ang ilahang responsibilidad ug pagsakripisyo aron mamahimong healthy siya ug ang baby. Ug sa pagpadaku sa mga anak, tulubagon nila kini sa Ginoo. Atong mahinumdoman ang tambag sa Dios: “Bansaya ang bata sa dalan nga angay niyang pagalaktan aron nga kon matigulang na siya dili siya mobiya niini.” (Proverbs 22:6)

Sa imong bahin, gipuy-an gyud kini sa imong inahan. Busa, dili ikatingala ngano nga gibuhat niya ang kinahanglan niyang buhaton samtang nagdako ka. Samot na gyud kay matud pa nimo, wala naman gud kay amahan nga mapananghiran. Mao nga mas doble gyud ang iyang pagpaningkamot nga matul-id ang imong dalan.

Naa koy nailhan nga usa ka inahan, ang iyahang anak murag “sakit sa ulo” sa pamilya…pabadlong samtang nagadaku isip teenager. Daghang luha ug pag-antos ang iyang nasinati tungod dili na gyud niya ma control ang mga paglaag sa iyang anak ug ang pagsupak sa iyang mga pahimangno. Usa ka higayon adto nilayas ang iyang anak ug wala siya nahibalo kung asa niadto. Pagbalik sa iyang anak, iya gyud kini gisultian, “mahibal-an ra nimo ang resulta kining imong gibuhat kung ikaw mamahimo na nga usa ka inahan”.

Ug tinuod, sama nimo, Maimai, nasabtan gyud niya ang tanang pagdisiplina sa iyang inahan kaniadto, when she became a mother herself, especially when her own children were in their adolescent years. Nakita niya ang iyang kaugalingon kaniadtong batan-on sab siya. Dinhi sab siya naka realize nga ang rason sa tanan niini nga pagdisiplina mao ang love and concern alang sa mga anak, ug gusto niya nga sila motubo nga mas maayo nga mga tawo. Ang kaayo lang sa iyang pagdisiplina mao ang pakig dialogue sa iyang kaugalingong mga anak. Busa, nagsugod sa iyang henerasyon ang pagsabot sa kinaiya sa mga batan-on ug unsa ang mga maayo ug epektibong pamaagi sa pagdisiplina. Niining paagiha, makasulti ako nga mas maayo ang iyang parenting style kaysa paagi sa pagpadako kaniya sa kaugalingon niyang mga ginikanan.

Sa imong bahin, tungod sab sa mga leksyon nga imong nakat-onan gikan sa imong kaugalingon nga pagdako, mahimo ka usab nga mas maayo nga ginikanan kaysa imong kaugalingon nga inahan. Kini tungod kay mahimo nimong ipadayon ang maayong istilo sa iyang pagpadako kanimo, ug ipaila nimo ang labing maayo/epektibong pagdisiplina alang sa mga bag-ong henerasyon sa mga kabatan-onan karon. Nahimo ka nga mas positibo sa imong pamaagi samtang nagpadako ka sa imong kaugalingong mga anak nga mas maayo kaysa imong gigikanan nga pamilya. Ingon niini ang imong pagtubo isip usa ka ginikanan labi na kung gibansay nimo ang imong kaugalingon nga mga anak sa mga pamaagi sa Ginoo. Walay laing pinakamaayong paagi sa pagpakita sa imong pasalamat sa imong inahan gawas sa pagpadako og maayo sa imong kaugalingong mga anak.

Remember to put God at the center of your own family and always pray for your children that they may grow up to be better persons, God-fearing and obedient to God’s will.

God bless you more,
Ate Emz