Free Clinic sa OMPH padayon

Daghan sa atong kaigsoonan ilabina sa kaugalingong mga komunidad o mga Gagmay’ng Kristohanong Katilingban (GKKs), walay access sa mga serbisyo sa panglawas o makakaya sa ilang kita samtang nag-abaga sa daghang palas-onon sa pamilya. Tungod niini, Ang Inahan sa Kanunay’ng Panabang (OMPH) nag-organisa og Free Clinic sugod karong tuiga para sa katawhan ug komunidad.

Ang walk-in appointment abre isip first come, first serve basis aron matan-aw sa doktor. Kini gi-organisa pinaagi sa tabang ni Dra. Connie Salumbides kauban ang mga Intern Students sa Davao Medical School Foundation ug mga volunteers nga taga parokya. Sila ang mihatag ug kadasig sa pagpadayon niining gikinanghanglan kaayu nga serbisyo.

Isip padayon sa pagpaningkamot, ang schedule sa Free Clinic matag Martes ug Huwebes kada semana sa alas otso hantud sa alas dose sa udto dinhi sa Satmi Gym Redemptorist Church. Dugang sa konsultasyon, aduna sab silay libreng tambal nga gipanghatag sa mga pasyente para sa ilang balatian.

Mapasalamaton ang mga katawhan sa talagsaon nga oportunidad nga makabenepisyo sa maong programa sa panglawas. Usa kini sa tinood nga kahulogan sa Alay Kapwa nga ginasaulog karon panahon sa kwaresma. (Mary Grace Gonzales | OMPH Soccom)