Digistry: Digital Ministry

Pinaagi sa kinasingkasing ug aktibong partisipasyon, mabungahong nagkatigom ang mga kabatan-onan sa Mary Help of Christians Parish (Don Bosco – Dacudao) inubanan sa mga kabatan-onan sa Don Bosco Mati sa gipahigayong Leaders and Animators Formation (LAF) nga adunay tema “DIGISTRY: Rebuild in the World of Digistry”. Kini gipanguluhan sa Salesian Youth Movement – FIS Core Group (SYM) nga gikan sa Cebu. Duha ka salesyanong pari, Rev. Fr. Keith Amodia, SDB (SocCom-Fis Delegate), Rev. Rooney John Undar, SDB (SYM-FIS Delegate), ug Senior Youth Leader, Daryl Torreon ang mihatag sa maong pormasyon. Gipahigayon kini sa maong parokya niaging Sabado, Pebrero 25, 2023.

Gipangulohan ni Fr. Undar, ang maong kalihokan gisugdan pinaagi sa Santos nga Misa ilabina nga adlaw usab kini sa kapistahan sa Salesian Protomartyrs, St. Luigi Versiglia ug St. Callistus Caravario. Gisugdan ang unang bahin sa aktibidad mahitungod sa Digistry ni Fr. Keith Amodia. Gihisgutan ang mga paagi diin atong mapatuman ang mga pagtulon-an sa Dios sa modernong kalibotan,nga mao ang Digital Ministry dili lamang mahitungod sa mga gadgets apan pagpaambit sa Ebanghelyo, nga sama sa tawo sa sambingay sa magpupugas, ang mga kabatan-onan magpadayon unta sa pagpugas sa pulong sa Dios, sama nga ang usa ka liso nga nagsugod sa pagtubo, motubo usab ang pulong sa Dios ug mamunga ug maayo diha sa kinabuhi sa tawo.

Sulod sa maong aktibidad, gipresentar ni Daryl Torreon (SYM-FIS Senior Youth Leader) ang kinabuhi ug hiyas sa bag-ong kanonisado nga santos sa Salesian Family, St. Artemide Zatti. Nahisgutan kong giunsa pagpuyo ni St. Zatti ang kinabuhi isip usa ka Salesiano, ang tanan niyang mga sakripisyo, ug ang iyang hugot nga pagtoo kang Maria Mananabang sa mga Kristiyanos. Dili ikatingala nga si St. Artemide Zatti gihimong ehemplo sa mga kabatan-onan karon. Gipakita sa mga partisipante ang iyang kaayo sa mga kabos, ang iyang paggahin ug panahon sa mga masakiton, ug ang mga kalisdanan nga iyang nasinati samtang nagpaingon sa pagkasantos.

Natapos ang formation sa gihisgutang strenna karong tuiga nga adunay tema, “As the yeast in today’s human family.” Gihatag kini ni Fr. Rooney Undar, mahitungod kini kanatong tanan nga sama sa gisulti ni Jesus; sama sa maayong patubo nga makatabang sa “tinapay sa pamilya sa tawo” nga motubo ug mahimong mas maayo. Nga kita mahimong patubo sa atong lain-laing mga lugar sa katilingban. Mahimong gamay ra ang atong sinugdanan, apan modako kini sama sa patubo nga subra ka gamay. Kon atong dawaton si Kristo sama sa patubo, ang Iyang grasya motubo sa atong mga kasingkasing ug mag-usab kanato gikan sa sulod ngadto sa gawas.

Ang Leaders and Animators Formation (LAF) usa ka aktibidad nga ginapahigayon matag tuig alang sa mga kabatan-onan. Karong tuiga, gihisgutan ug nakat-onan sa mga kabatan-on ang bili sa paggamit sa teknolohiya sa pagpadayon sa pagsangyaw sa maayong balita ilabina nga kini adunay dakong impluwensya sa pangadlaw-adlaw nga kinabuhi.

Mapasalamaton ang mga kabatan-onan kang Rev. Fr. John L. Cardinal ug Rev. Fr. Ariel M. Arias, SDB alang sa pagtugot ug walay hunong nga pagsuporta sa pagpahigayon sa maong aktibidad diin kini usa ka dakong oportunidad sa mga kabatan-onan.

Isip usa ka batan-on wala nay mas makapadasig kanato kay sa pagkanta, pagsayaw, ug pagpakig lambigit sa atong isigkabatan-on. (Arrafe Sumampong and Jeffrey Mondejar | Mary Help of Christians Parish, Dacudao)