Dangpanan: Helpdesk sa mga Parokya Imontar

Isip tubag sa maka-alarma nga mga isyu kabahin sa mental health, imontar sa mga parokya ang usa ka helpdesk isip kabahin sa multi-sectoral network nga gitawag ug DANGPANAN, kon Duolanan sa mga Nanginahanglan og Panabang.

Atol sa bag-o pa lamang gipahigayon nga Family Day sa Family and Life Apostolate sa St. Francis Xavier Regional Major Seminary (REMASE), gihimo ang soft launch sa DANGPANAN ni Rev. Fr. Orlando Angelia, director sa Family and Life Apostolate sa Archdiocese of Davao.

Mao kini bunga sa gihimong inisyal nga panagtigom sa FLA sa pipila ka mga volunteers nga naglangkob sa gimugna nga komitiba alang niini tali sa mga eksperto sa natad sa mental health sama nila ni Sr. Leah Zozobrado, RVM ug Dr. Jerson John Trocio, mga psychologists.

Si Dr. Trocio ang nahimong mamumulong sa gihimong Family Day niadtong Sabado, Pebrero 25, 2023.

Tumong nga makab-ot sa maong komitiba mao ang pagpalapad sa kahimatngon sa mga isyu sa katilingban; maghimo og proactive nga tubag aron kapugngan ang mental ug katilingbanon nga mga suliran sama sa human trafficking ug suicide; ug pag-establisar og support mechanism.

Gipasabot ni Dr. Trocio nga sa “suicide – dili tanan, depressed; ang uban, maoy nakab-ot nga solusyon sa ilang suliran.” Busa siya midugang nga sa maong kahimtang nga huyang ang usa ka tawo ug nabug-atan sa suliran, dako ang iyang panginahanglan nga katabangan ug dako usab ang kalambigitan niini nga espirtuhanon nga bahin sa pagkatawo.

“Dili ulaw mangayo og tabang,” si Dr. Trocio nagkanayon, “Dako og porsyento ang physical health, pero wala maapil ang mental health, ang psychological disposition.”

Nakapaalarma sa grupo nga sa sayong pangidaron sa ocho o nwebe anyos sa pagkakaron makahunahuna na sa pagkutlo sa ilang kinabuhi, ilabi na kadtong biktima sa pagpang-abuso, bullying sa tulunghaan ug mismo sulod sa pamilya.

Busa ablihan ang helpdesk sa mga Parokya diin mamahimong maka-dangop kadtong buot nga magpatambag. Ug aron nga kahatagan ug kahimanan sa kahibalo ug pamaagi ang mga modumala niini sa mga Parokya, gitakda nga magpahigayon og pagbansay karong Abril 15, 2023 nga pangunahan nila si Sr. Leah Zozobarado ug Dr. Jerson John Trocio.

Lakip sa mga motabang sa maong proyekto mao ang pundok sa mga psychologists, mga social workers, ang kabatan-onan sa arkidasyosis, mga social communications ug social media teams sa mga Parokya, mga abogado nga mohatag ug legal aid, mga relihiyosong kamadrehan ug kaparian.

Mamahimong mga first responders ang ipailawom sa pagbansay nga mga sakop sa FLA inabagan sa mga kabatan-onan social action, ug SoCCom. Human sa pagbansay ipahigayon ang regular nga mga update matag ulahing Sabado sa bulan nga panagtigom.