Ang Mahigugma sa iyang Kinabuhi, Mawad-an Niini

Domingo sa Pasyon (Domingo sa Lukay – April 2, 2023)
Is 50:4-7 / Ps 22:8-9, 17-18, 19-20, 23-24 / Phil 2:6-11 / Mt 26:14-27:66

Ang pasyon sa atong Ginoong Jesukristo sumala ni San Mateo, naghulagway sa mangil-ad ug makalilisang nga gisangpotan sa kinabuhi sa atong Ginoo. Ang pagbutang-butang og sala maoy nakahimo pagpalansang Kaniya sa krus. Usa ka sakit nga palandongon nga ang atong Ginoo nagbuhat ug maayo, makiangayon, nag-ayo sa mga masakiton ug nagsulti sa kamatuoran gihukman sa kamatayon. Dili sakto ang nahiaguman sa atong Ginoo. Ang iyang kinabuhi nahunos tungod sa bakak nga tumo-tumo ug linaog nga kinaiya.

Sa laing bahin, ang krus nga gipas-an sa atong Ginoo naghulagway sa kapait, kalisod, kasakit ug kamatayon nga mao usab ang tinubdan sa kinabuhi, ang kinabuhing walay katapusan. Kita nahimong gawasnon tungod sa kasakit, pagkamatay, ug pagkabanhaw sa atong Ginoo. Gawasnon kita sa sala nga maoy nakagapos kanato ug naghimo kanato nga mga ulipon ug daotan. Ang sala nga maoy hinungdan nganong adunay kamatayon. Apan ang krus dili mao ang katapusan sa kinabuhi sa atong Ginoo kondili kini ang tulay tali sa Dios ug sa tawo. Nasayod siya nga ang iyang panaw maoy magisi sa tabil tali niining kalibotana ug sa kalibotan sa Dios. Ang atong Ginoo mosaka ngadto sa trono sa Dios ug makig-uli sa Dios ug sa tawo diha sa iyang lawas. Ang atong Ginoo nahibalo nga ang iyang nabanhaw’ng lawas mao ang bag-ong sakripisyo ug ang bag-ong templo. Pinaagi sa iyang pasyon iyang ablihan ang utlanan tali sa langit ug sa yuta. Ang iyang dalan paingon sa unahan sa kinatumyan sa bukid sa templo ngadto sa kahitas-an sa Dios mismo. Mao kini ang dakong tungasan diin iyang gitawag kitang tanan. Siya kanunay nga magpabilin uban kanato dinhi sa yuta ug Siya makig-uban kanato nga usa ka Dios. Siya ang maggiya kanato dinhi sa yuta paingon sa langit.

Sa katapusan, kinahanglan natong isulti pag-usab: ang krus kabahin usab sa pagsaka ngadto sa kahitas-an ni Jesukristo, sa pagsaka sa kahitas-an sa Dios. Sama sa mga kalihokan niining kalibotana imposible nga makab-ot ang dagkong mga resulta kon walay pagsakripisyo sa kaugalingon ug paghago; maingon nga ang kalipay sa usa ka dakong pagdiskobre sa kahibalo o sa usa ka tinuod nga kahanas nalambigit sa pagdisiplina. Ang pagpaningkamot sa pagkat-on, mao ang dalan paingon sa tinood nga kinabuhi. Ang atong Ginoong Jesukristo nga misaka sa kahitas-an sa Dios pinaagi sa krus maoy magpataltiwala kanato. Ang krus mao ang pagpadayag sa kahulogan sa gugma: kadto lamang nawad-an sa ilang kaugalingon ang nakakaplag sa ilang kaugalingon.(Cf. Jn.12:25) (Bro. Soren Abellanosa)