“Sunod Kanako”

Midawat sa Orden sa Pagkapari si Rev. Jonn Flor M. Mangrobang, pinaagi sa pagpandong sa mga kamot ni Labing Talahurong Obispo Guillermo Afable, DD, Enero 31, 2023 sa Mary Mediatrix of All Grace Cathedral, Digos City. Ang maong ordinasyon atol sa pag saulog sa Kapistahan ni San Juan Bosco.

Gipamulong sa Obispo nga ang pagpangalagad sa mga pari magsugod sa pagka sumusunod ni Kristo ug kinahanglan kini ug tulo ka butang “one, isalikway nimo ang imong kaugalingon. Ikaduha, pas-anon nimo ang imohang krus, ang krus nga imohang kinahanglang pas-anon tungod sa imong pagsalikway sa imong kaugalingon ug ang tanang nahilambigit sa imong pagka kaugalingon. Unya ikatulo, sunod kanako”, matud pa ni Bishop Afable. Ang maong ordinasyon gitambungan sa mga diocesan ug relihiyoso nga kaparian, uban usab ang mga konsagradong relihiyoso. Mitambong usab ang mga mahal sa kinabuhi ni Rev. Jonn Flor, iyang ginikanan, lola, mga igsoon, kahigalaan ug mga parokyano sa San Isidro Labrador Parish-Hagonoy nga mao ang iyang parokya, naa usab ang mga parokyano sa Sto. Niño Parish- Magsaysay kung diin didto siya na assign isip diaknono.

Atol usab sa ordinasyon gihimo ang makahuluganong pag Consagrar ni Fr. Jonn Flor sa iyang kaugalingon isip pari diha sa Mahal nga Birhen Maria.

Sa wala pa ang katapusang panalangin gihatag sa obispo ang assignment ni Fr. Jonn Flor nga sugod January 31, 2023, siya padayon nga mangalagad sa Sto. Niño Parish-Magsaysay isip Assistant Parish Priest. (Dominic Paul Amisola, SocCom Magsaysay | Photos by John Rodel Tinampay)