Sangpita Siya

Ang kapistahan sa Sto. Niño usa ka relihiyoso nga selebrasyon nga pipila lang ang nagsaulog sa tibuok kalibotan. Bisan tuod Espanyol ang titulo nga “Sto. Niño” nga pasabot “Balaan nga Bata” ang mga Pilipino adunay lig-on nga debosyon niini. Ang mga singgit sa “Viva Señor Santo Niño” ug “Viva Pit Señor” milanog sa tibuok nasod samtang ang mga lungsod ug syudad nagsaulog sa adlaw sa kapistahan.

Ang “Viva” susama nga ekspresyon sa “ulan nga yelo” ug sa literal nagkahulogang “pagkinabuhi”. Gigamit kini isip pagpasidungog sa Ginoong Hesus. Ang “Señor” us aka Kinatsila nga pulong nga ang pasabot “Ginoo”. Ang titulo gihatag sa pagpasidungog sa Batang Hesus isip pag-ila sa iyang pagka-Dios ug awtoridad sa tanan. Ang pulong nga “Pit” pinutol nga termino sa Cebuano nga “sangpit.”

Unang bulan sa tuig mao ang bulan sa Batang Hesus. Usa kini sa mga ginapangandaman nga pista kay tungod ang mga Pilipino naay dakong gugma sa Batang Hesus. Mao nga malampusong gisaulog ang ika-48 ka tuig nga kapistahan ni Sr. Santo Niño nga maoy patron sa Gagmay’ng Kristohanong Katilingban (GKK) sa Upper Ilang, Zone-12 A nga nahisakop sa St. Francis Xavier Parish, Tibungco. Ang tema sa kasaulogan sa kapistahan niining tuiga nagkanayon: “Kauban kita sa Batang Hesus, Sr. Sto. Niño sa paglakaw niining hiniusang panaw: Komunyon, Partisipasyon ug Misyon.” Gisaulog usab sa Katilingban ang pag-abot sa restored image sa Sto. Niño nga usa ka gasa nga nahatag sa katilingban. Ang Misa gipangulohan sa ilang kura paroko, Rev. Fr. Proceso “Jun” Gimeno niadtong Enero 15, 2023 sa alas onse sa buntag.

Gisugdan ang dakong kasaulogan pinaagi sa Enthronement og debosyon isip pagsaysay sa kasaysayan sa pag-abot sa Sto.Niño sa Pilipinas.

Gidagsa gihapon sa mga deboto ang Kapilya sa Sto. Niño sa Upper Ilang tungod gusto nila bisatahon ug makita ang kaanyag sa naayong imahe. Ginatuohan nga kining Imahe, naa nay pangidaron o sa ato pa, antique na kini. Daghang mga deboto nga nagahikap niini ug nagapangamuyo sa balaang bata nga tagaan sila ug maayong panglawas, ilayo sila sa katalagman ug panalipdan ang matag pamilya. Ginaadto sab kini sa mga mabdos alang sa pagampo sa luwas nga pagpanganak.

Angay gayod kita musimba ug magpasalamat sa Dios sa tanang grasya nga atong nadawat ug mag-ampo sa Batang Hesus nga panalipdan unta kita niya sa mga katalagman. Niining kapistahan sa Diosnong Bata, kita gipahinumdoman ni Kristo sa pagpabilin nga masaligon sa panabang sa Dios Amahan, mapaubsanon, masinabtanon ug mapasayloon sa isigkaingon.

Gihuman ang maong kasaulogan sa Santos nga Misa sa usa ka Traditional Sinulog Dance nga gipangandaman sa GKK. Sto. Niño Youth Apostolate.

Viva Señor Santo Niño!! Viva Pit Senyor!

(Paul Angelo Gastanes)