“Pilia ang Ginoo”

Unang Domingo sa Panahon sa Kwaresma (February 26, 2023)
Gn. 2:7-9; 3:1-7 / Ps. 51:3-4. 5-6. 122-13. 17 / Rom. 5:12-19 / Mt. 4:1-11

Kita nga mga tawo kasagaran mas nabalaka karon kon unsa ang makapabuhi kanato og dili kung unsay makapahimo sa atong kinabuhi nga takus. Lagmit, gikapoy na kaayo ta sa trabaho nga wa na gani ta kapangumusta sa mga myembro sa atong pamilya. Daw murag wala natay panahon sa paglingaw og pagamoma sa atong tagsa-tagsa nga pamilya. Naghupot kita og usa ka tasa nga kape apan nasentro lang ta sa tasa, dili sa unsa kalami ang maong tinimpla.

Kini ang dakong punto sa atong Ebanghelyo karon: gipakita ni Jesus kanato nga ang kinabuhi dili bahin sa pagtagbaw sa atong kaibog sa gahom og materyal nga bahandi. Ang importante dili ang atong naangkon kondili ang atong gisimba ug gituohan nga mao ang atong Dios. Ang kalibotan karon adunay paagi sa paglingla kanato. Kini napuno sa mga kabalaka, tentasyon, ug kalingawan, nga nagsaad kanato ug kalipay apan dili gayod makaluwas sa bug-os.

Tingali gibati nimo ang kabug-at sa dihang nagtan-aw sa kahimtang sa kalibotan—nabug-atan sa korapsyon ug kalibog nga naglibot kanato. Bisan ang adlaw-adlaw nga mga responsibilidad nga gihatag kanato mahimong mabug-at. Kon magpokus kita niining yutan-ong mga butang ang atong mga mata mawala gikan sa “mga butang nga langitnon.” Nakalimtan na nato ang mga panalangin ug mga saad nga atong naangkon isip mga anak sa Ginoo, ug ang atong katagbawan diha kang Kristo nawala usab.

Niining panahon sa kwaresma, mogahin kita ug panahon uban sa Ginoo, makigsulti Kaniya, mamalandong sa atong mga prayoridad, ug atubangon ang atong pangandoy alang sa lumalabay nga mga kalipay sa kalibotan. Atong tugotan ang kaluoy sa Dios sa paghugas sa atong mga sala.

Sa samang istorya, atong ilingaw ang atong kaugalingon sa pag inom sa kape, og dili magreklamo kung unsa ang hulagway sa tasa. Kon galing ang tawo maayo lang sa kalibotanong mga sukaranan ug kadaogan dili gihapon siya mamahimong malipayon kung dili siya magtinguha sa langitnong kadaogan. Magkinabuhi kita nga yano, maghigugma nga madagayaon, magpasaylo bisan sa kasakitan, magpakabana, magsulti nga mabination, ug magkinabuhi nga matarong. (Bro. Ranie Boy Pamplona)