Nangalagad Sukad 1973

Niadtong Pebrero 12, 2023, usa ka PSL sa Zone 8 GKK San Isidro Labrador upper Calcal sakop sa San Roque Parish Malabog ang nagsaulog sa iyang ika-50 ka tuig sa pagpangalagad isip Pangulo sa Liturhiya. Si Felicisimo “Simo” B. Pedrosa, 77 anyos, adunay 7 ka anak og biyudo nagpabilin pa gihapon sa pagpangalagad sa simbahan.

Ang selebrasyon gisugdan pinaagi sa Santos nga Misa pinangulohan sa kura paruko nga si Rev. Fr. Arnold Balaquinto. Iyang gepamulong nga kaniadtong panahon sa pandemya ang tanang mga hamtong nga nagedad ug 60 pataas pahulay usa og dili usa magapil-apil sa pagsaulog og sa ingon-ini nga balaod atong mabansay kon unsay gibati ni Tatay Simo. Gidid-an ang mga hamtong sa pagpangalagad. Sila naguol o nasakitan kay hapit 2 ka tuig nga gihikawan. Apan sukwahi kuno ang hulagway nga gipakita ni tatay sa katilingban, sa sona, sa kinatibuk-an sa parokya, ilabina sa arkidayosis sa Davao.

Dugang ni Fr. Arnold, “Ang pagpangalagad ni tatay Simo sa iyang ika-50 ka tuig isip PSL priceless, dili masukod nga ganti o premyo nga iyang nadawat. Hago o sakripisyo aron makapadayon lang Si tatay Simo sobra sa pagsalig, pagkamatinud-anon sa iyang pagpangalagad.”

Uban sa kura paruko, adtong adlawa gedeklara, sinaksihan sa tanan nga nanambong,gikan sa ministriya sa PSL,sugod sa sunod adlaw siya usa na ka Pangulo sa Katilingban.

Paghuman sa Misa, nagkahiusa ang tanan sa pagpaniudto. Gisugdan ang hamubong programa pinangulohan ni Fr.Arnold uban sa iyang partner emcee nga mao si Jerlyn M.Juaton. Malipayon nga naminaw ang tanan tungod kay gibasa ang Kasaysayan sa Pagpangalagad ni tatay Simo kaniadto hangtud sa kasamtangan. Dili tiaw ang pagsulay nga iyang naagian sa iyang kinabuhi apan dili babag og wala kini nakapahugno kaniya. Hinuon mao kini ang naghatag og kusog aron siya makapadayon sa pagpangalagad. Daghan usab ang mihatag sa ilahang mensahe pasalamat usa na niini ang kanhi pari nga ubos sa iyang pagpangalagad nga mao si Rev. Fr. Onesimo Tabaco, iyahang anak nga si Alma Novo, Jaypee Joromat og si Chuchie Joromat.

Mapasalamaton si tatay Simo sa tanang nanambong ilabina sa kura paruko, tanang coordinator sa parokya, mga kaubanang pangulo o miyembro sa sona, mga pangulo og bisita sa nagkalain laing GKK. Mapasalamaton pod siya sa iyang pamilya, mga paryente sa ilahang suporta kaniya.

Mensahe ni tatay Simo, Daghan ang nakapangutana kanako nganong kadugay na ba nako sa pagpangalagad,unsa ang akong sikreto? Sa akong hunahuna wala gayud ako’y sikreto. Kung unsa man ang akong naabot,dili kini akong pagboot, dili kini akong paninguha, dili kini akong pangandoy nga moabot sa ika-50 ka tuig, samtang ako gitahasan, samtang ako gisaligan nga mahimong pangulo kini akong kalampusan pinaagi sa pagsunod nako sa Ginoo, mao ra gayud ang pagbuhat nga nahasubay sa kabubut.on sa Ginoo. Bisan pa man sa mga pagsulay sa akong kinabuhi isa ra gayud ang akong gihuptan, ‘Nasa tao ang gawa,nasa Diyos ang awa’. Kung ako nagmagul-anon pa sa akong pagpangalagad, kung wala ako’y gibati nga kalipay og ako nakabaton og kalipay sa kinabuhi kini nagagikan sa Diyos. Atong hinumdoman, Ang tawong malipayon,malahutayon.”

S-sinugdan sa katilingban
I-imahe sa kahayag sa katawhan
M-matinumanon nga alagad sa Ginoo
O-oportunidad nga makapaambit sa kinabuhi ngadto sa uban.
by: Jaypee Joromat

Ang pagkamanggihatagon dili lang sa salapi kundili pinaagi sa pulong, hunahuna o presensiya.

Hagit alang kanato, magagikan gayud sa kasingkasing ang pagpangalagad tungod kay iya mang gipadayag ang iyang pagpangalagad subay o sukaranan diha sa dako kaayong gugma.

Happy 50 years in service Tatay Simo.

MAY THE ALMIGHTY GOD BLESS YOU ALWAYS!

(Noralyn Largo)