Mga Unang Lakang sa Pagtukod sa Simbahan

Adlawng Huwebes, ika-syam sa bulan sa Pebrero gipahigayon sa parokya sa San Juan Pablo II ang pagbendita ug pagbubo ug semento alang sa singkwentay-dos ka mga poste sa ginahimong simbahan. Sa matag poste, ilubong ang mga pipila ka butang sama sa karaang rosaryohan nga naguba na tungod sa kadugayon ug kanunayng paggamit sa mga magtotoo. Lain pa niana ang mga nadugmok nang mga statwa sa mga santos, isip pagpakita sa atong pagtoo diha sa ilang mga pag-ampo ug pangaliya. Duna puy mga langyaw nga mga sinsilyo nga iapil sa paglubong duyog sa pagtoo nga ang simbahan universal o gituohan sa tibuok kalibotan. Pipila ka mga medalyon usab ni San Benito sa Nursia ang gibutang isip pagpangayo dinha sa panalipod gikan sa tanang kadaotan. Human sa pagbendita sa mga balaang butang, gilubong kini sa matag poste una tabunan sa semento.

Dako ang pasalamat ni Reberendo Padre Russell Bantiles tungod nasugdan na gayod kining pagtukod sa simbahan. Naglaom siya nga sa padayong tabang sa mga parokyano sa Los Amigos ug mga sakop nga barangay mahuman na kini sa dili madugay.