Kasaulogan nga Puno sa Kahinangop

Viva Maria! Viva Jesus!

Human nakasinati ug makalilisang nga pandemya sa mga milabay’ng mga tuig, ang mga parokyano sa Virgen delos Remedios Crossing Bayabas Toril nahinangop og nagkahiusa sa pagsaulog sa ika-12 nga kapistahan nga adunay tema nga “Virgen delos Remedios, among kauban sa panaw ug sumbanan sa kahiusahan, partisipasyon ug misyon.”

Bisperas sa kapistahan gipahigayon ang koronasyon sa search for Little VDLR and Little SVF 2023 nga gisalmotan sa 76 ka GKKs pinaagi sa pagsuporta sa mga kandidata kada distrito. Ang 2nd runner up gikan sa distrito 3 SVF Shrine nga sila Karlice Antonnett L. Yuzon ug Cyrel Vien Y. Dela Cerna. Ang 1st runner up gikan sa distrito 1 San Lorenzo Ruiz Toleda Village nga sila Shahara Kizelah R. Canosa ug Cedrick Quiño, ug ang gikoronahan sa titulo sa His and Her Majesty 2023 nga gikan sa distrito 2 Mary Antonette Escarpe sa GKK sa Birhen sa Lourdes ug Carl James P. Sarmiento sa GKK Sto. Niño Batulosa. Ang kura paroko nga si Fr. Anthony Silvosa og gisundan sa Her and His Royal Majesty 2023 ug mga runner-ups nagsindi sa kandila sa kahayag nga nagsimbolo sa gugma ug serbisyo sa mga GSL’s ngadto sa mga katawhan nga sakop sa Gagmayng Kristohanong Katilingban.

Human sa koronasyon, gisunod dayon ang prosesyon sa patron sa Virgen Delos Remedios, uban sa mga patron sa nagkalain-laing GKK sa distrito 1 ug 2. Sa adlaw sa kapistahan, Pebrero 2, 2023, adunay 5 ka misa nga gisaulog nga una pa magsugod adunay blessing diin lain-laing distrito ang sponsor sa mga kandila. Pagkahuman sa Pontifical Mass nga gipangulohan ni Most Rev. Romulo Valles, DD, adunay mga parlor games nga gisalmotan sa tanang distrito. Panahon sa paniudto, lipay kaayo ang mga parokyano tungod kay adunay litson nga gihatag ni Fr. Silvosa nga giambitan sa tanan, ingon man sa mga bisita daghan mga food packs ang nakaandam og nahinam-hinam ang tanan sa dihang gituyok na ang tambyulo alang sa raffle draw.

Ang 10 ka mananaog sa Php 500.00 consolation mao sila: Angeline Sarmiento, Rosalyn Naqiula, Jesusa Quinto, Gilbert Macias Jr., Michel Trocio, Darlene Carrano, Cheyenne Remulta, Maribel Varcla, Juliet Astillo, ug Nenita Villamor. Ang third prize nga nakadaog sa Panasonic washing machine mao si Ginalyn Torrefiel. Ang 2nd Prize nga nakadaog ug Vivo Smart Phone mao si Rodgene Casquejo ug ang palaran nga nakadaog sa 1st Prize 50″ Samsung Smart TV mao si Teresita N. Barsagas nga sakop sa GKK St. Paul The Apostle.

Human sa raffle draw mao ang championship game sa volleyball league for women nga ang naglantugi mao ang Sta. Cruz Upper Piedad Versus Birhen sa Kasilak Alambre. Naningkamot ang tanang mga manunula apan ang midaog mao ang Sta. Cruz Upper Piedad, 1st Runner Up ang Birhen sa Kasilak Alambre, 2nd Runner Up Ang Immaculate Concepcion Lubogan ug ang 3rd Runner Up ang Sto. Niño Cogon. Ang nakabaton sa MVP award mao si Jowanie Cano ug ang sportsmanship and friendly GKK team mao ang Birhen Sa Kasilak Alambre. Wala usab nagpalupig ang mga kalakakihan tungod kay gidula usab ang championship sa Basketball ug ang midaog mao ang San Lukas Team. 1st Runner Up San Pablo, 2nd Runner Up San Pedro, 3rd Runner Up San Felipe. Human sa awarding namauli ang tanan nga malipayon ug mapasalamaton sa among kura paroko nga maoy gihimong instrumento sa mahal nga Virgen Delos Remedios aron magmabulukon ang iyang kapistahan inubanan sa lamdag sa Balaang Espiritu Santo. (Lilibeth Sancover | Photos by VDLRP and DCH)