Espirito sa Pasko

Natapos na ang panahon sa Pasko, apan alang sa mga taga Brgy. New Carmen Dumpsite, ila pang nasinati ang espirito sa pagkamanggihatagon sa uban.

Anaa sa kapin kon kulang tres sientos (300) ka mga kabataan ang mga benepisyaryo sa gift-giving nga gipangunahan sa Archdiocesan Social Communications duyog sa mga myembro sa Social Communications Committee niadtong Enero 28, 2023 sa hapon. Kini nga panghitabo, usa ka hiniusang proyekto sa mga Parish SoCComs ug kini girepresenta sa mga Parish SoCCom sa Our Mother of Perpetual Help, St. Francis of Assisi sa Maa, St. Jude Thaddeus Shrine, San Lorenzo Ruiz, ug San Roque.

Perte ka enjoy ang mga bata lakip na ang mga ginikanan nga nalipay para sa ilang mga anak sa ing-ani nga panahon tungod kay talagsaon lang kini. Mga giveaways nga gilangkuban sa toothbrush, toothpaste, prutas, mga biskwit ug kendis, dulaan ug pagpapili ug tsinelas sa mga bata nga daw murag sa rated-K. Human niini, naglinya sila sa pagkuha ug food packs ug tubig nga gipanghatag sa Romualdo’s Catering. Dako ang pasalamat sa mga residente nga sila ang nahimong benepisyaryo sa maong programa.

Sa ngalan sa Archdiocesan Social Communications kauban sa mga Parish SoCComs sa Arkidiyosis sa Davao, dakong pasalamat sa mga tawong may malumong kasingkasing nga mihatag ug donasyon ug sa mga boluntaryo nga nitabang sa pag-repack nga kinsa naghimo niini nga kalihukan nga malampuson. Sa makausab daghang salamat ug dalaygon ang Diyos! (Mary Grace Gonzales | OMPH Soccom)