Daghan mi

Dear Ate Emz,

Minyo na ako ug duna kami usa ka 3 year-old nga anak, lalaki. Medyo dugay kami nagka anak sa akong asawa tungod dunay daghang kakuliian sa akong kinabuhi. Late naman gud ko nagminyo gumikan sa dako ang akong pamilya. Dose kami nga managsoon ug medyo kumplikado. Dili ko na lang idetalya basta ang akoa lang nga nalampasan ko ang mga pagsulay nga mga nanglabay. Na sulbad namo ang mga problema emotionally, financially. Taliwala sa mga problema ako mibarog ug naningkamot. Wala gayud ako nawad-an ug paglaom kay tungod duna akoy dakong pagsalig ug pagtoo sa atong Ginoo. Nakita sab nako nga akong mga ginikanan naglisod mao nga ako maoy miagak kanila aron dili sila mahusno. Naningkamot ako nga makalampos sa pageskwela hangtod sa nagkatrabaho ug naka pundar. Giuna ko sa paghan-ay ang akong mga igsoon ug pamilya una ako nagpuyo layo kanila.

Dako kaayo akong pasalamat sa Ginoo nga akong nasinati ang maong kapait sa kinabuhi. Nahimo akong mas epektibo, hardworking and showing the value of life and family.

Lugwayan pa unta sa Dios Amahan ang akong kinabuhi aron sa paghatag ug assistance sa akong mga igsoon ug usab sa akong kaugalingong pamilya.

Mapasalamaton sa gihapon,
Pet-Pet

* * * * * *

Dear Pet-Pet,

Pagdayeg ug pasalamat sa Dios nga sa paghinumdom sa imong mga kasinatian sa kinabuhi sa pamilya, makadawat kag kahupayan ilabi na kung nasagubang nimo ang tanang mga pagsulay.

Sa amoang panahon kaniadto, ang usa ka dako nga pamilya nga naay 8 – 9 ka mga anak, giisip nga usa ka panalangin ug bahandi. Apan usahay giisip sab nga “insurance” sa katigulangon sa mga ginikanan. Sa pagkatinuod lang, aduna gyud kalipay ug kaharuhay sa dakong pamilya tungod kay magtambayayong sa mga buluhaton sa panimalay ug sa uban pang mga responsibilidad. Apan bug-at gyud sa mga ginikanan ilabi na sa pagpaeskwela ug uban pang mga panginahanglanon, kung lisod sa pinansyal nga aspeto ang pamilya.

Naa koy nailhan usa ka pamilya nga 10 kabuok ang mga anak. Nagkalisud-lisod ang ginikanan paggasto sa ilang pageskwela tungod kay naay duha ka anak sa kolehiyo ug 4 ang naa sa high school. Ang desisyon sa ginikanan, gipaundang ang mga anak nga naa sa high school ug ang usa nga naa sa kolehiyo. Gipatiwas usa ang igsoon nga 2nd year na sa kolehiyo. Kalooy sa Dios, nakatrabaho dayon siya pagkahuman sa iyang kurso ug iya na sab gitabangan makatiwas ang nagsunod kaniya. One at a time, sa hinay-hinay, nagtinabangay ang mag-igsoon aron makahuman ang ubang mga manghod. Ang pinaka swerte sa tanan mao ang kamanghuran tungod kay daghan na ang nag “finance” sa iyang edukasyon mao nga sa Manila gyud siya nagtiwas sa iyang kurso.

Ang edukasyon maoy usa sa pinakaimportante nga paagi sa pagpalambo sa kalidad sa kinabuhi sa usa ka indibidwal. Sa imong kabahin, bulahan gyud ang imong pamilya tungod kay dako kaayo imong sakripisyo alang kanila. Naningkamot ka nga makahuman sa imong pageskwela ug giuna nimo paghan-ay ang imong mga igsoon, tungod kay concerned gayud ka sa ilaha ug gusto nimo nga sila usab molampos. Nagtuo ako nga ang imong mga ginikanan ug mga igsoon very proud gyud sa imoha.

Sa pagkatinuod lang, ang tanan grasya sa Ginoo. Kung imong balikan ang mga nangaging kasinatian, siguro makapangutana ka sa imong kaugalingon… “giunsa nako paglampos ining mga pagsulay?” Dinha ka makaamgo nga ang Ginoo wala gyud diay mobiya kanimo, ug nagalihok gayud Siya sa imong kinabuhi taliwala sa mga kalisdanan. Mao nga sa katapusan dili nimo mapugngan ang pagpasalamat sa tanang mga kasinatian! Ug labaw sa tanan, nakat-on ka sa pagpaningkamot, pagkugi, ug nahatagan og dakong bili ang pamilya. This is what matters most, that in the process and in the midst of all the trials, we become more patient, persevering…dili basta basta matarog, ug hinuon, mas labing hingpit ang pagsalig sa Ginoo.

Sa laing bahin, imong gipadayag nga unta lugwayan pa sa Ginoo ang imong kinabuhi aron makatabang ka pa sa imong mga igsoon. Dugang pa niini, naghisgot sab ka nga imo una silang gipahiluna bag-o ka naglahi ug puyo isip pamilyado na. Timailhan lamang kini nga dako kaayo ang bili nga imong gipahinungod sa pamilya. Maayo gyud kini nga sumbanan sa ubang mga anak, ug nagsilbi ka nga good model sa uban nimong mga igsoon. Mapa “sana all” gayud kita sa imong gipakita sa imong pamilya.

Pahinumdom lang… Just remember to strike a balance in extending assistance to your family of origin. Other siblings can take over especially if they have already finished their own schooling and are gainfully employed. Hinaot unta nga sa imong pag-alalay, na empower sila to face the challenges of family life now that you have your own family to nurture. Mao na kini sila ang imong prayoridad karon.

May your paths always be blessed as you journey with your family, allowing Jesus to lead, as he is the Way, the Truth and the Life… accompanied by Mama Mary, our Lady of the Way.

God bless you more,
Ate Emz`