Bulahan ang Gitawag sa Pagka Piniyalan sa Katilingban

“Bulahan sila nga nagatuman sa balaod sa Ginoo,” salmo niadtong Pebrero 12, 2023, pagka nindot paminawon ug pamalandungan nga ang mga lideres nga gitawag sa pag-alagad mutuman sa balaod sa Ginoo, nga sila mamahimong panig-ignan diha sa tagsa-tagsa ka katilingban. Ang mga GKK Servant Leaders sa San Pedro Cathedral, madasigon sa pag bag-o sa ilang panaad, bisan pa sa mga hulga sa kalisod, kasakit, mga kahilayan nga musangpot sa pagpakasala, wala kini makababag diha sa pagbag-o sa ilang panaad nga mamahimong piniyalan sa katilingban.

Pagkahuman sa pagpahitabo sa pagbag-o sa mga pangulo, gisunod dayun ang “General Assembly” diin ang tumong mao ang mosunod: pagpasabot sa resulta sa SINODO (Synthesis), nga gikan sa pagtambayayong sa nagkahiusang panaw sa katawhan, diha sa pag-ila sa mga pagbati ug panginahanglan sa matag-usa, ug sa pinaka ubos sa katilingban, ang nagpa-ambit ug nagpasabot mao ang formation in-charge nga si Sòr Ma Elfieda, ikaduha, gihisgutan usab mao ang PAGKAPINIYALAN, nagpahinumdom sa nga ang tinood nga kalipay, naa diha sa pag-paambit, subay sa kinaiya ni Jesukristo; ug ang ikatulo mao ang umaabot nga kalihukan nga makadugang ug pondo alang sa mga panginahanglan sa simbahan, alang diha sa plano nga “TOTAL REPAIR” O KINATIBUK-ANG PAGPAAYO, tungod sa kadugayon na niining maong straktura ug daghan nang kalamindad ang nahiaguman niining maong simbahan, kining tanan gipasabot sa Parish Administrator nga si Fr. Voltaire P. Dimol, wala masayang ang usa ka adlaw nga panaghimamatay tungod kay mao usab kini ang unang panagtigom nga nahitabo human sa pandemya. (Rosalinda C. Jabonillo | San Pedro Cathedral Parish – SocCom)