BIBLIYA: Ang Buhing Pulong

Isip pagsaulog sa Bible Month adunay Parish Bible Symposium nga gipahigayon sa Parokya sa St. Mary of the Perpetual Rosary niadtong Enero 25, 2023. Bisan tuod ulan-ulan ang panahon wala kini makatandog sa mga parokyano nga madasigon nga mitambong.

Gisugdan kini sa ‘Pilgrim Dance’ isip pagpasidungog sa Balaang Kasulatan, gibasa ni Sis. Jo Paningbatan ang Ebanghelyo ug misunod ang pagpaila sa takus nga mamumulong nga si Rev. Fr. Romeo Coronel, OSA.

Ang unang gihisgutan ni Fr. Romeo mahitungod sa R.A. 11163. tungod nahisakop sa Asya Pasipiko diin nagsulabi ang mga Kristiyano, gihatagan ug bili ang Bibliya ug giproklamar nga ang katapusang Lunes sa Enero mao ang ‘National Bible Day’, magmalipayon kita niining gasa nga gihatagan og bili sa atong mga lideres labi na sa atong Pangulo niadtong 2017.

Ang kalambigitan sa Buhing Pulong sa atong kinabuhi may mga tumong nga ipaabot kanato diha sa Tema: “Ang Pulong giya sa Dalan, Kamatuoran ug Kinabuhi.” Kini ang Kasulatan nga perpekto o walay sayop mahitungod sa pagtoo.

Maanindot ang mga pagtulon-an nga gihan-ay ni Fr. Romeo ilabi na sa Bible versus Cellphone; “Ang cellphone laging binabasa kung may bagong message, ang Bibliya hindi binabasa kaya hindi makita ang mensahe”. Kini naghatag ug kaamgohan sa wala paghatag ug bili sa Balaang Kasulatan ug nga mas nahimo pa ganing bililhon ang makabag-ong gadget.

Sa katapusan, dili lang unta sa matag Enero ang paghatag dinha sa panahon sa pagbasa sa maayong balita apan matag adlaw sa tibuok tuig.

Dalaygon Ka hangtud sa kahangturan!

(Maria Dexie Calvo, GKK SoCCom)