Simbang Gabi sa among GKK

Usa sa mga pinaka-karaang mga katilingban sa dakbayan ang Panorama Homes sa Buhangin. Kini nahisakop sa parokya sa St. Mary of the Perpetual Rosary Parish ilawom sa GKK sa Inahan sa Kanunayng Panabang.

Sulod sa treintay-sais ka tuig, ang mga lumolupyo niining katilingbana nagpabilin sa ilang pagka madasigon sa pagpangalagad ug pagpakita sa ilang gugma sa Mahal nga Inahan.

Karon sa solemnidad sa kapistahan sa pagkainahan ni Birhen Maria, sigurado ang dakong kalipay sa mga katawhan. Kini tungod gipahigayon ang novena masses o Simbang Gabi sa kapilya.

Kini usa ka sugyot ug hangyo ngadto sa kura paroko nga si Fr. Dionisio Tabiliran tungod kadaghanan sa mga lumolupyo ug mga myembro sa GKK, mga edaran. Matod pa ni Fr. Boy Ong nga dual citizen na kuno ang mga myembro sa kapilya tungod dili lang Filipino Citizen apan Senior Citizens usab.

Kung sa mga milabay nga tuig gipahigayon kining mga novena masses sa alas tres sa kadlawon, niining tuiga, nahitabo ang matag misa sa alas sais sa kagabhion.

Tuod man dako kaayo ang pasalamat sa mga myembro sa GKK sa dakong grasya. Malipayon kaayo ang tanan nga natagaan ug pagtagad ug katumanan ang ilang hangyo. (Photos: Nitz Nartea)