Pagpangandam sa Kapistahan sa Mahal nga Inahan

December 8, 2022 – Ang Immaculate Conception Parish, Mintal, Davao City nagsaulog sa ilang ika-63 nga Parochial Fiesta nga dunay tema nga: “Birhen Maria, panig-ingnan sa gugma ug kadasig sa pagpangalagad diha sa Kristohanong katilingban nga nagalawig alang sa kahiusahan sa tibuok Simbahan.”

Isa sa mga pagpangandam nga gibuhat sa parokya mao ang pag organisa ug Pilgrimage Masses diin gituyok ang 66 ka mga GKK nga nahisakop sa Parokya. Sa maong Pilgrimage Masses gidasig ang matag GSL o mga pangulo nga manguna sa pag-alagad sa matag novena mass sa simbahan isip usa ka commentator, lector, salmista ug myembro sa choir. Tungod niini nakita ang aktibong partisipasyon sa matag GSL.

Ang mga kabatan-onan usab nagpakita sa ilang suporta pinaagi sa pag organisa ug Parish Night.

Atol sa kapistahan sa Immaculate Conception Parish, Mintal gisugdan ang Santos nga Misa sa alas singko sa gabii nga gipangulohan ni Most Rev. Romulo G. Valles, D.D, Arsobispo sa Dabaw nga giapilan sa mga bisitang Pari, lakip niini ang kura paroko nga si Rev. Fr. Johnny Autida. Sa iyang homiliya gipaambit ni Archbishop Valles nga “buhi ang pagtoo diri sa atoa. Kay tungod pud kini sa atong closeness kang Birhen Maria. Pinalangga kita sa Ginoo. Kay ugaling masipyat kita o makasala ang unang mangita kanato kay ang Dios. Mangita siya kanato kay gimahal ta Niya. Maong muoli kita nga dala ang mga pamalandong ug mga gasa gikan sa atong pagtoo.” Gidayeg usab ni Archbishop Valles ang kadaghanon sa mga kabatan-onan sa Immaculate Conception nga nisalmot sa misa. Ug iyang nakita ang kaugmaon sa parokya kauban ang mga batan-on. (Ma. Deborah Kassandra Y. Cordova)