Napugos Ko

Ang mga Pangulo sa Katilingban (PSK) sa St. Mary of the Perpetual Rosary Parish, Buhangin nagpahigayon og Team Building niadtong January 15, 2023 didto sa Gethsemane Garden, Brgy. Datu Salumay, Marilog District, Davao City. Kini gitambongan sa mga PSK sa mga Gagmay’ng Kristohanong Katilingban (GKK) nga nahisakop sa parokya nga gipangulohan ni Brod Dionisio Daro, PSK Parish Coordinator. Adunay, pasundayag kada sona, parlor games ug exchange gift diin niining adlawa mao ang pagsaulog sa post Christmas party sa mga PSK. Gihatagan usab og higayon ang matag PSK Zone Coordinator uban sa usa ka representative nga PSK nga sakop sa sona nga mohatag sa ilang mga kasinatian isip tigdumala sa ilang tagsa-tagsa ka GKK. Nagkalain-laing mga kasinatian ang gipaambit nga mamahimong inspirasyon sa matag usa isip pangulo sa katilingban. Ang pinaka word of the day mao ang “napugos ko” kay wala nay lain. Sa pagkatinuod dakong grasya gikan sa Ginoo nga mamahimong pangulo sa katilingban ug dili lalim tungod usa kini sa pagtahan sa kaugalingon ug sakripisyo diin dinhi mahibaloan kung unsa kataas ang pasensya sa usa ka PSK. Busa ang mga Pangulo sa Katilingban nahagit, mobarog sa tuig 2023.

Gisalohan ug gipagaambitan sa matag PSK ang mga grasya. Pagkahuman sa salu-salo gihimo dayon ang exchange gift. Aron masinati ang kaanindot sa kinaiyahan, gisuroy sa mga PSK ang palibot sa maong lugar. Gihuman ang usa ka adlaw nga kalihukan pinaagi sa pag-ampo nga gipangulohan ni Brod Bonifacio Abanggan. Sa pagpanguli sa matag usa ka PSK dala ang kalipay ug dili makalimtan nga mga kasinatian.

P-adayon
S-a kakugi diha sa
K-atilingban.

(Arsenia P. Barimbao, PSK)