Kinaiyang Mapaubsanon

Mabulokon ug malampuson nga gisaulog ang ika-62 nga GKK fiesta sa Sr. Sto. Niño, Sarro, Manuel Guianga, Tugbok District; sakop sa Parokya sa San Francisco de Asis. Ang tema: “Sto.Niño: Ang tinubdan sa kalinaw diha sa paglakaw sa atong pagtoo.”

Gisaulog ang kapistahan niadtong Enero 15, 2023 ug kini gipangandaman pinaagi sa pagnobena. Bisperas sa kapistahan sa alas singko sa buntag gipahigayon ang pagprosisyon sa imahe sa Batang Hesus, ug giapil ang mga imahe sa mga panimalay. Sa adlaw sa kapistahan,gipahigayon ang Santos nga Misa sa alas 10:00 sa buntag nga gisaulog ug gipangulohan ni Rev. Fr. Mario B. Holmina,OSJ. Malipayon si Fr.Mario sa kadaghan sa tawo nga mipakita sa ilang pag debosyon sa Batang Hesus pinaagi sa pagsimba ug pakiglambigit sa ilang kaugalingon diha sa espiritohanong bahin. Matud pa sa homilya ni Fr. Mario sama sa Batang Hesus ang kinaiya nga mapaubsanon maoy mahimong sumbanan sa matag usa. Ang kinaiya sa usa ka bata dependent kini sa ginikanan. Unta kita usab dependent pud sa kabubut-on sa Amahan. Ug nga unta pinaagi sa kalinaw diha sa atong paglakaw diha sa pagtoo mahuptan pud nato ang kinaiya nga mapaubsanon sama sa Batang Hesus. Dalaygon ang Dios! (Ednalyn Malacura)