Kasaulogang Mabulokon

Upat na ka dekada nga ginasaulog ang kapistahan sa parokya sa Sto. Niño sa Kaputian. Human ang duha ka tuig nga kamingaw sa mga kalihokan, nakabalik nag inanay ang mga pasundayag alang sa kapistahan.

Adlawng Sabado, bisperas sa kapistahan, gibalik na ang fluvial parade nga gisalmutan sa mga parokyano sa Kaputian. Human sa pagbendita sa mga pumpboat ug lantsa sa kura paroko nga si Fr. Edsel Paloma, gisakay na ang imahe ni Sr. Sto. Niño sa dakong lantsa aron sa paghalad ug Santos nga Rosaryo samtang ang mga bangka naglibot sa usa ka bahin sa isla ug sa pagtapos sa matag misteryo, ang mga deboto, naghalad ug awit.

Duyog sa mga parokyano ang mga kapulisan, kasundalohan ug mga taga Philippine Coastguard aron sa pagseguro nga luwas ang pagpahigayon sa maong parada. Human sa usag tunga ka oras nga parada sa tubig, gidawat sa mga katawhan ang imahe ni Sr. Sto. Niño sa isla pinaagi sa maanindot nga sayaw sa mga kabatan-onan. Dinhi gituyok sab ang imahe libot sa parokya inubanan sa mga pag-ampo sa mga parokyano.

Gisugat nasad sa maanindot ug alegre nga banda ug mga mananayaw ang batang Hesus gawas sa parokya dayon misunod ang Santos nga Misa nga mao ang kinaulahiang novena mass.

Sa adlaw sa kapistahan, tapos ang tulo ka misa sa buntag, gipahigayon ang Zonal Culutural Show sugod sa ala una y medya sa hapon. Ang mga kabatan-onan nangandam gayod alang niining mga kalihokan gani ang uban sa mga kubo sa parokya na nagpabuntag aron maseguro ang kahapsay ug kaandam sa palibot ug sa mga musalmot sa maong pasundayag. Nahimong mananaog ang Zone 5 nga gisundan sa Zones 1 and 3.

Gipahitabo usab ang usa ka raffle draw diin ang mananaog sa double door refrigerator isip grand prize mao si Ms. Joyce Rosario ug dayon misunod ang basketball exhibition game sa mga taga parokya batok ang mga GSL sa San Miguel Parish Panacan.

Mapasalamaton ang tanan ilabi na ang kura paroko sa mainiton nga pagsuporta sa mga parokyano labi pa ang mga ahensya sa gobyerno nga aktibo nga mihatag sa ilang presensya ug uban pang mga tabang alang sa katumanan sa mabulokon nga selebrasyon.

Gilaoman nga sa sunod nga kapistahan mas dako pang selebrasyon ang ipatigayon. (Photos by DCH, Joemar Faelnar, and Sto. Niño Parish SoCCom)