Kapistahan sa Sto. Niño Kaputian

Ang kapistahan ni Sr. Sto Niño ang gituohan nga usa sa pinasahi apan pinakadakong selebrasyon nga ginasaulog sa tibuok Simbahang Katoliko. Nahimong popular nga debosyon kini 500 anyos na ang milabay nga unang nahimugso sa Syudad sa Sugbo. Gidala kini nga pagtoo sa nagkalain-laing lugar sa atong nasud ug usa ang Parokya sa Kaputian sa bikaryato sa Immaculada Conception ang mipili nga himoon kining patron.

Matag ikatulong Dominggo sa bulan sa Enero ginasaulog sa Kaputian ang adlaw sa kapistahan ni Sr. Sto. Niño ug karong tuiga natunong ang dakong selebrasyon sa ika-15 sa Enero. Mao usab kini ang ika-40 ka tuig nga nahimugso ang maong Kristohanong katilingban isip Parokya ni Sr. Sto Niño dinhi sa Arkidayosis sa Davao.

Ang tema karong tuiga: “Sr. Sto. Niño: Giya sa mga matoohong piniyalan; kahingpitan sa sinodong simbahan.” Nahimong inspirasyon sa mga parokyano ang gasa sa kinabuhi taliwala sa dakong epekto sa pandemya. Tungod niini, buot ipakita sa katawhan ang dakong kalipay pinaagi sa pagpuyo sa diwa sa pagkapiniyalan nga nakig uban ni Kristo diha sa kahingpitan sa sinodong simbahan.

Nadasig usab nga pukawon ang dakong debosyon sa milagroso nga Diosnong Bata nga gihikaw sa mga parokyano dinhi sa Kaputian tungod sa pandemya. Gibati sa katawhan ang kamingaw sa pipila ka mga pinasahing tradisyon sama sa panaw duaw, fluvial ug road procession, indak-indak sa kadalanan ug uban pa aron tim-os nga mapadayag ang dakong debosyon kang Sr. Sto Niño. Tungod niini nahimong sentro sa planning ang pagbalik sa mga naandang kalihukan.

Opisyal nga giabrihan ang selebrasyon pinaagi sa Panaw Duaw (GKK visitation) kaniadtong Desyembre 15, 2022. Gituohan nga ang pagbisita sa Mahal nga imahe ni Sr. Sto. Niño, ang pagpakita sa kahinangop sa usa ka bata sa iyang ginsakopang Gagmayng Krisotohanong Katilingban.

Kagahapon, Enero 14, 2023, sa ala una sa hapon didto sa Kaputian Public Wharf gihimo ang tradisyunal nga pagbendisyon sa mga sakyanan sa dagat ug misunod ang nindot nga fluvial procession nga giapilan sa mga parokyano. Limitado gihapon ang tugutan nga moduyog sa maong debosyon tungod sa mga nasabutang restrictions aron masiguro nga luwas ang pagpahamutang niini uban ang katawhan.

Mosunod ang Road Procession nga paga apilan sa parada sa mga imahe sa tanang patron sulod sa Sto. Niño Parish – Kaputian. Mouban usab niini ang grupo sa mga batan-on ug mga devotees nga mopadayag sa dakong pasalamat kang Sr. Sto Niño pinaagi sa pag indak-indak sa kadalanan. Human niini himoon ang Santos nga Misa pagka alas tres sa hapon.

Karong adlawa, adunay tulo ka Misa nga magsugod sa alas 6:00 sa buntag (Cebuano Mass), alas 8:00 sa buntag (Cebuano Mass) ug alas 10:00 sa buntag (Fiesta Mass). Karong tuiga nasabutan sa Parish Pastoral Council nga dili usa himoon ang ilado nga Sinulog sa Kaputian tungod sa hamubo nga panahon nga mahan-ay kini apan himoon ang usa ka Cultural Dance Contest nga pagasalmutan sa tanang Sona sa Parokya. Human sa kompetisyon ipatigayon ang raffle draw isip usa ka fund raising project. Adunay basketball exhibition game usab sa hapon nga paga apilan sa mga pinili nga kupunan sa Sto Niño Parish ug mga GSL sa San Miguel Parish Panacan.

Dili malilong ang kalipay sa katawhan tungod sa hinay-hinay nga pagbangon ug pagbalik sa dakong debosyon alang kang Sr. Sto Niño. Hinaot nga atong ubanan ang Diosnong Bata diha sa Iyang panaw nga mao ang diwa sa sinodong simbahan. Dinhi hingpit nato nga masinati ang kalipay isip hiniusang pagtoo sama sa kalipay sa usa ka bata nga si Sr. Sto Niño. VIVA PIT SENIOR!!! (Eliazar Luna Gualdajara, Jr.)