Dili Ulahi ang Bibliya

Adlawng Sabado, Enero 21, atol sa Bible Symposium, nga gipahigayon sa San Pablo Parish, si Fr. Rene Ribac, Vice Rector sa Regional Major Seminary nagpaambit sa iyang kaalam bahin sa bibliya. Iyang gikubli nga ang pulong diha sa bibliya dili usa ka yano nga teksto kondili usa kini ka pulong nga nahimong unod ug ang maong pulong nahimong tawo nga si Hesu-Kristo mismo nga mao ang “dalan, kamatuoran, ug kinabuhi”. Si Hesus, sa iyang panglantaw, mao ang walay kataposang Pulong nga nahimong unod ug naglungtad sukad pa sa sinugdanan uban sa Dios.

Ang tapok sa mga kabatan-onan pinaagi sa Davao Archdiocesan Youth Coordinating Apostolate nagdala sa hapit dos syentos ka mga indibidwal diha sa St. John Paul II Hall sa parokya sa San Pablo. Sulod sa arkidayosis, 35 ka mga parokya ug usa ka quasi-parish ang nagpadala sa ilang mga representante alang niining pagtimbaya sa National Bible Month duyog sa Archdiocesan Bible Apostolate of Davao.

Ang pagpaambit nga gihatag ni Fr. Rene Ribac nag-abli sa mga kabatan-onan diha sa daghang mga pangutana ug kaamgohan. Sa ilang paginambitay pinaagi sa mga small group sharing daghang mga kalisod ang minggawas ug daghan pod ang mga kasinatian nga nagdala kanila sa kaamgohan nga kinahanglan pa gayod nila tagaan ug pagtagad ang pagbasa sa bibliya.

Tapos ang mga sharing sa buntag, gipahitabo ang usa ka Bible Quiz sa kinahaponan ug diri nahimong mananaog ang mga representate gikan sa 3 ka mga parokya. Una ang parokya sa Santiago Apostol sa Bunawan, ika-duha ang parokya sa San Miguel Panacan ug ang ika-tulo ang parokya sa San Isidro Labrador sa Catalunan Grande.

Dili lamang ang mga mananaog ang mipakita sa ilang kalipay apan apil ang tanang mga misalmot sa maong symposium. Dugay-dugay sab nga naghinam-hinam ang mga kabatan-onan sa mga ingon-ani nga kalihokan ug panagtapok sa simbahan.

Sa katapusan, ang Director sa DAYCA nga si Fr. Kim Samones naghatag sa iyang mga pasalamat, ug nagpaambit sab sa iyang gamayng kasinatian bahin sa pagbasa sa balaang kasulatan. Sumala pa niya lupig pa ang mga fiction books tungod sa bibliya dili lang usa o tulo ka genre ang imong mabasa apan daghan kaayo. Kung ang usa ka batan-on nangita ug makalingaw nga balasahon, dili ulahi sa listahan ang bibliya.

Dako usab ang pasalamat ni Fr. Kim sa sponsor sa mga ganti nga gihatag nga bisan gani kadtong mga miapil lamang sa quiz nakadawat man gihapon. (Bro. Angelo Espinas | Christine Camus)