Debosyon Sa Batang Hesus

Gisugdan sa San Francisco de Asis Parish – Tagakpan ang novena sa Sto. Niño niadtong Enero 6, 2023, adlaw’ng Biyernes. Ang unang adlaw sa novena nahimong espesyal ug mabungahon tungod kay gisugdan kini pinaagi sa usa ka motorcade gikan sa Brgy. Manuel Guianga padulong sa Parokya. Miduyog usab sa unang adlaw sa novena ang mga kabatan-onan sa Parokya nga miyembro sa PSB-Joseph Marello Youth pinaagi sa pagpasundayag sa ilang talento sa pagsayaw sa Sinulog dance.

Pagkahuman sa motorcade ug dance presentation, gisugdan ang Santos nga Misa nga gipangulohan sa Kura Paroko nga si Rev. Fr. Mario Holmina, OSJ. Sa homiliya, gitagaan ug duot ni Fr. Mario ang importansya sa atong debosyon sa Ginoo pinaagi sa Batang Hesus Sto. Niño. Giimbitahan usab ni Fr. Mario ang mga parokyano nga musalmot sa siyam ka adlaw nga novena mass isip preparasyon sa kapistahan sa Sto. Niño nga mahitabo sa ikatulog domingo sa Enero.

Sa kapistahan sa Sto. Niño sa January 15, 2023, adunay motorcade nga pagahimoon. Dugang pa niini, aduna usab blessing sa mga Sto. Niño images, ikaduhang Sinulog Dance Presentation, ug Sto. Niño look-alike contest.

Mapasalamaton usab ang usa sa mga ginikanan sa mga batan-on nga mipasundayag sa ilang talento kay pinaagi sa pagsalmot sa mga aktibidades sa parokya, mas napaduol ang iyang anak sa pagserbisyo sa Ginoo, labina na gayud sa Sto. Niño nga mao ang tinubdan sa atong debosyong Katoliko.

Nindot usab nga makita ang pagtinambayayongay sa mga parokyano ug mga GKK og ministry leaders nga gipangulohan sa kura paroko nga si Fr. Mario Holmina, OSJ. Pinaagi sa pagtinabangay sa usa’g usa, mas mahimong mabungahon ug makahuluganon ang pagserbisyo sa Ginoo.

Ang San Francisco de Asis Parish adunay tulo ka mga GKK nga Sto. Niño ang patron. Kini mao ang GKK Santo Niño North Naming (Zone 1), GKK Santo Niño Sarro (Zone 3), ug GKK Santo Niño Sirib (Zone 5). Malipayon nga misalmot ug misuporta ang miyembro sa mga GKK sa nagkadaiyang sona sa mga aktibidades sa Parokya nga may kalabutan sa kapistahan sa Sto. Niño.

Nagalaom ang tanang parokyano sa Tagakpan nga mas mapakusgan pa ang ilang pagsalig sa Ginoo pinaagi sa ilang debosyon sa Sto. Niño. (SFDA SoCCom)