Dan-ag sa Kahayag

Solemnidad sa Epipaniya sa Ginoo (January 8, 2023)
Is 60:1-6 / Ps 72:1-2, 7-8, 10-11, 12-13 / Eph 3:2-3a,5-6 / Mt 2:1-12

Si Kristo mao gayod ang dakong kahayag nga nagdan-ag sa tibook kalibotan. Siya mao ang nakita sa mga mago pinaagi sa giya sa bitoon. Ang pagpadayag sa himaya sa Dios diha kang Kristo Hesus nga mao ang lintonganay nga simbolo sa presensya sa Dios sa atong taliwala. Ang Dios nga nahimong tawo ug mipuyo uban kanato.

Ang mga makinaadmanon sa sidlakan nakakita sa bitoon sa natawong hari sa mga Judio. Ang mga tawo sa halayong dapit nakakita og dakong kahayag ug maoy nakabantay sa takna sa pag-abot sa Dios. Sila maigmat nga nagbantay sa lihok sa kalibotan. Sukwahi kini sa mga tawo sa Herusalem kay nasayod sila kon hain matawo ang Kristo sumala sa gisulat sa propeta, apan dili sila maigmat sa iyang pag-abot. Kon ato kining lantawon diha sa spirituhanong reyalidad, kinahanglan kita magmaigmat kanunay sa lihok sa Dios diha sa atong kinabuhi. Atong bantayan kanunay ang mga pagpadayag sa Dios diha sa atong mga kasinatian.

Kon makabantay na kita sa lihok sa Dios diha sa atong kinabuhi kinahanglan nga atong bansayon. “Ug sa ilang pagsulod sa balay nakita nila ang bata uban kang Maria ang iyang inahan, ug mihapa sila ug misimba kaniya; ug unya inablihan ang sudlanan sa mga bahandi, gihalaran nila siya og mga gasa: bulawan, insenso ug mira.” Ang mga mago mihalad og mga halangdong mga halad. Sa laing pagkasulti ilang gihalad ang labing taas nga matang halad ngadto sa bag-ong natawo nga hari. Diha sa spirituhanon nga kasinatian, ato bang gihalad ang kinatibuk-an sa atong kinabuhi diha sa Dios. Ato ba gayod nga gihigugma ang Dios diha sa tanan natong hunahuna, kasingkasing, kalag, ug kusog. Dili ba kaha kini sama sa pag-inom nato sa kape diin atong butangan ug asukal sumala sa atong gusto og pagboot. Ang hagit mao nga ato gayod nga itugyan ang tanan ngadto sa Dios.

Sa katapusan, sa pagbuhat nato niining tanan: pagmaigmat sa kabubot-on sa Dios ug pagbansay sa lihok sa Dios, kita mahimo ngadto sa pagkabag-ong binuhat. “Ug human sila pahimangnoi pinaagi sa damgo sa dili pagbalik ngadto kang Herodes, namauli sila agi sa laing dalan padulong sa ilang rehiyon.” Sa dihang makaplagan na nato si Kristo diha sa atong kinabuhi kita dili na gayod mobalik sa karaang dalan nga atong gilaktan. Si San Pablo nagpahinumdom kanato sa iyang sulat ngadto sa Efeso ato gayod nga hukason ang karaan natong pagkatawo ug isul-ob nato ang bag-ong pagkatawo. Si Hesukristo ang Anak sa Dios nagpasinati kanato sa Dios nga matood. Siya ang kahayag nga nagdan-ag kanato aron mahiabot kita sa gingharian sa Dios. (Bro. Soren Abellanosa)