Ang Kalig-on Dili Masukod sa Gidaghanon

Niadtong Disyembere 9, 2022 gisaulog sa GKK ICC-Langub ang ilang ika-34 nga kapistahan uban sa ilang tema: “SANTA MARIA ANG IMMACULADA CONCEPTION, SUMBANAN SA PAGSALIKWAY SA SALA UG PAGSUNOD SA KABUBUT-ON SA GINOO,” diin adunay Act of Consecration ngadto kang Birhen Maria, isip pagtahan sa kaugalingon ngadto kang Maria nga gipanamkon nga walay buling sa sala.

Ang GKK ICC-Langub nga sakop sa San Roque Parish, usa sa mga sudlonon kaayo nga kapilya. Aduna gayu’y layo nga distansya gikan sa sentro og dili pa gayud sayon ang dalan niini. Apan sa maong selebrasyon anaa ang mga pangulo sa tibuok Sona 4, kinsa nagpakita sa ilang suporta ngadto sa ilang kaubang kapilya pinaagi sa pag-apil sa Santos nga Misa nga gidumala ni Father Arnold Balaquinto, Kura Paroko. Anaa usab ang pipila ka mga PPC members og mga parokyano gikan sa ubang sona.

Tinuod gayud nga ang kalig-on sa katilingban dili masukod sa gidaghanon niini. Masukod kini diha sa kinasing-kasing nga paglihok, pagbuhat og pagtahan sa kaugalinon diha sa matinud-anon nga pagdayeg sa Ginoo. Sama sa gihimo sa katilingban sa GKK ICC-Langub nga aduna lamang 11 ka mga balay nga nahisakop niini. Uban sa pag-agak sa ilang mga kaubanan sa sona og ni Father Arnold, sila nagpabiling lig-on kay tinud-anay man ang ilang gugma ngadto sa Dios.

Sa espesyal kaayo nga paagi gipasalamatan ni Father Arnold ang mga pangulo nga nagdumala sa katilingban kinsa kinasing-kasing nga mitahan sa ilang kaugalingon alang sa simbahan.

Mapasalamaton si Bro. Marcial-PSK sa presensiya sa matag-usa nga naghatag og dugang kinabuhi sa ilang selebrasyon. Human sa Santos nga Misa, giambitan sa tanan ang giandam nga paniudto sa katilingaban sa GKK ICC-Langub.

Wala gisayang sa matag-usa ang higayon nga mahinabi nila ang ilang mga kaubanang magtotoo gikan sa bata, batan-on, hamtong o tigulang man lakip na sa ubang sona. Kay ang matag-usa gasa man nga makatabang kanato sa paglikay sa mga kasal-anan.

Sumala pa ni Fr. Arnold, “ang pinakadakong proyekto sa Dios sa kalibutan mao ang pagluwas sa tanang katawhan gikan sa sala, pinaagi sa iyang bugtong Anak nga gipakatawo ni Birhen Maria,” tungod niana, kita kinahanglan nga maningkamot sa paglikay sa sala og magkinabuhi uban sa pangama ni Sta. Maria, ang Immaculada Concepcion, pinaagi ni Kristo nga atong Ginoo.

Sa kanunay dalaygon ang Dios!

(Jozeil Comapas Crodua, Youth SocCom)