Unang Misa Human sa Pandemya

Malampusong gisaulog ang ika-24 nga Kapistahan sa Solemnidad sa Kristong Hari “Solemnity of Christ the King” sa Gagmay’ng Kristohanong Katilingban (GKK) sa Christ the King, Bread Village nga nahisakop sa St. Mary of the Perpetual Rosary Parish, Buhangin nga adunay tema nga nagkanayon: “Piniyalang Katilingban Kahiusa sa Panaw ug Misyon Uban sa Kalinaw ni Kristo.”

Isip pagpangandam sa maong kapistahan gipahigayon ang pagrosaryo, Hiniusang Pag-ampo, Novena nga nagsugod niadtong Nobyembre 10 hangtud 18, 2022. Sa katapusang gabii, gihimo ang pagprosesyon sa Imahe sa Kristong Hari palibot sa Bread Village ug pagkahuman sa prosesyon gipahigayon ang ika-siyam kon katapusang gabii sa Novena.

Ang Santos nga Misa alang sa pagsaulog sa maong Kapistahan sa Kristong Hari gipahigayon niadtong Nobyembre 19, 2022 sa alas 6 sa gabii ug kini gipangulohan ni Rev. Fr. Boy Roland Ong, Resident Priest sa St. Mary of the Perpetual Rosary Parish, kini mao ang unang misa nga gipahigayon sa maong katilingban human ang duha ka tuig nga pandemya.

Gipaambit ni Fr. Boy Roland Ong ang mahitungod sa panultihon nga “forgive and forget” diin mabungahon ang pagpasaylo sa nakasala sa isigkatawo kung kini inubanan sa gugma. Matod pa ni Fr. Ong nga sa sulod sa 24 ka tuig nga pagsaulog sa kapistahan sa Mahal nga Patron ug kung ikaw aduna pay kalagot, kapungot gihapon sa imong kauban o kapamilya panahon na nga imo kining pamalandungan aron ikaw makapasaylo pinaagi sa gugma, sama kang Hesus nga kita gipasaylo tungod sa iyang dakong gugma.

Tungod sa pagtinabangay ug supporta sa matag-usa, sa mga GKK Servant Leaders (GSL) ug mga miyembro nahimong nagmalampuson ang kasaulogan sa kapistahan. (Sheryl Saldo ug Maria Teresa Amor)