Taliwala Kanato ang Dios

Solemnidad sa Pasko sa Pagkatawo sa Ginoo (December 25, 2022)
Is 52:7-10 / Ps 98:1, 2-3, 3-4, 5-6 / Heb 1:1-6 / Jn 1:1-18

Ang Solemnidad sa Pasko sa Pagkatawo sa atong Ginoo usa ka pagtimaan nga ang atong Dios duol gayod kanato. Si Hesukristo ang bugtong Anak sa Amahan nakig-ambit kanato sama’g tawo, aron ikapadayag sa Dios ang iyang dakong gugma dinhi kanato. Ang Dios nahimong tawo, sabton nato kini nga wala gihukas sa Dios ang iyang pagka-Dios apan gusto sa Dios nga makiglambigit Siya kanato, sa atong kasamahan.

Ang ebanghelyo ni San Juan naghulagway nga “sa wala pa buhata ang kalibotan, ang Pulong diha na uban sa Dios, ug ang Pulong Dios.” Si Hesus, ang ikaduhang Persona sa Santissima Trinidad, makighimamat sa tanang mga binuhat. Ang Pulong nga nahimong tawo ug nagtukod sa iyang tolda uban kanato. Ang panagtagbo sa langit ug sa yuta daw panagtagbo sa Dios ug sa iyang mga binuhat. Si Hesus matod pa sa pagpadayag sa atong pagtoo, “Dios gikan sa Dios, kahayag gikan sa kahayag.” Ang selebrasyon sa Pasko sa pagkatawo sa atong Ginoo usa ka kahigayonan sa atong pakiglambigit sa Diosnong kinabuhi.

Ang ebanghelyo mipadayon sa pag-ingon “wala gayo’y binuhat nga nabuhat gawas kaniya, ang tanang butang nabuhat pinaagi kaniya” [tungod Siya ang pulong]. Si Hesus ang Anak sa Dios maoy tinubdan sa tanan nga mga binuhat. Pagkaanindot nga palandongon nga kitang tanan mamahimong mga anak sa Dios, musubay ug mosunod kanunay sa kabubut-on sa Dios. Hagit kanunay kanatong tanan nga pakatawhon nato ang Dios diha sa atong mga pulong ug buhat. Ang Dios maoy sentro sa atong kinabuhi ug mahimong kinatibuk-an natong pagkatawo.

Apan sa laing bahin tungod sa sala ang kalibotan wala makaila kaniya bisan tuod nga “diha na Siya sa kalibotan, ug ang kalibotan nahimo pinaagi kaniya…” Subo nga palandongon nga mianhi ang Dios aron pagpakigtipon kanato apan atong gisalikway ang iyang pakighigala kanato. Atong gipasulabi ang paghigugma sa kalibotan. Atong giwad-an og dapit ang Dios diha sa atong tagsa-tagsa ka kinabuhi.

Sa katapusan, ang Dios wala mihunong sa iyang laraw nga Iya kitang luwason gikan sa kaulipnan sa sala. Si Hesus nagpakatawo og wala lamang nagpabilin nga bata diha sa pasungan kondili miagi ug misinati Siya sa mga kalisdanan ug kapait, ug ang labing dako, gipakita Niya kon unsaon pagpakigrelasyon sa Dios, aron matudloan kita unsaon paglabang niining kinabuhi ngadto sa kinabuhi nga tunhay nga gisaad kanato. Si Hesus bisan Dios, apan wala siya nagpanuko sa pagpakigtipon kanato samag tawo. Ang Dios mipaubos sa Iyang kaugalingon aron kita mapataas. Kita mobalik ngadto sa Dios kay gikan man kita sa Dios. (Bro. Soren Abellanosa)