Selebrasyon sa Davao Carmel

Adlawng Sabado, Disyembre 10, 2022 ang ika-singkwenta nga anibersaryo sa dedikasyon ug pagkonsagrar sa simbahan sa Davao Carmel o mas inila nga Carmelite Monastery sa dalang Bajada. Nianang adlawa usab gisaulog ang ika-setentay singko nga anibersaryo sa Davao Carmel. Alas syete sa buntag ang Santos nga Misa gipangulohan ni Fr. Ramil A. Oraiz, OCD. Una nagsugod ang seremonya mipaso ang mga pamilya nga nagsimbolo sa mga haligi sa simbahan, sa ilang pagpaso nadungog ang maanindot nga awit nga naggikan sa mga myembro sa Holy Cross Choir sa pamunoan ni Sir Amiel G. Baculna.

Matod pa sa pasiuna, “this is our Jubilee celebration, for the nuns, the Carmelite order, the Archdiocese of Davao, priests, religious order and for all the faithful that make the history of this house of God. This edifice which makes a place of worship to the triune God is in the center of our communion with one another and the peaceful haven through the generations.”

Dako gayod ang pasalamat sa kongregasyon niining hubileyo ug sila naglaom nga muabot pa sa daghan pang katuigan ang maong katilingban ug ang simbahan.

Sa homiliya ni Fr. Ramil siya mipaambit nga espesyal ang maong luna, dili lang sa iyang pisikal nga istruktura apan labi na espiritual nga pagmugna sa simbahan.

Kung buot huna-hunaon, tingali daghan na kaayong mga pag-ampo ang mga gidungog, ug daghan napod ang nahimong mga santos nga wala pa lang nato mailhi nga dinhing simbahana midangop.

Sa katapusan, ang pagka sagrado sa maong simbahan dili tungod sa mga kamadrehan nga nagpuyo dinhi apan tungod sa sinsero nga mga pangaliya nga gihalad sa matag tawo nga midangop kang Birhen Maria.

Pagtapos sa Santos nga Misa, dunay mga pagkaon nga gipagaambitan gawas sa simbahan isip pasalamat sa mga parokyano nga kanunayng misuporta sa Davao Carmel.