Oplan Tabang Part II

Malampuson nga nahatod ang ika-duhang hugna sa hinanali nga tabang alang sa mga biktima sa baha ug landslide didto sa Diocese of Digos niadtong Disyembre 13, 2022. Kini usa ka inisyatiba sa Archdiocese of Davao pinaagi sa Archdiocesan Social Action Center (ASAC) nga motabang sa atong mga igsoon nga nabiktima sa mga nagkalainlaing kalamidad. Ug kini nagmalampuson tungod sa hiniusang tabang gikan sa mga parokya, mga pribadong tulonghaan o institusyon ug labaw sa tanan ang walay puas nga pagkamanggihatagon sa mga parokyano dinhi sa atong Arkidayosis sa Davao.

Tungod niini ang ASAC nakahimo ug 2,000 food packs diin gibahin kini sa upat ka mga parokya nga adunay grabeng epekto sa nahiagumang pagbaha ug landslide niadtong Nobyembre 16, 2022. Ang mga parokya nga nahatagan sa mga food packs base sa rekomendasyon sa Social Action sa Diocese sa Digos mao ang San Roque Parish (Sulop), St. Teresa of Avila Parish (Malalag), Our Lady of the Assumption Parish (Sta. Maria) ug San Vicente Ferrer Parish (Basiawan).

Mapasalamaton ang Archdiocese of Davao pinaagi sa ASAC sa tanan nga nahimong kabahin niining malampuson nga pagtabang sa mga biktima sa baha ug landslide didto sa Diocese of Digos. (Bro. Cecilio L. Canico | Photos: Rhoderick Hernandez)