Nahiusa Kang Kristo Pinaagi sa Bunyag

ADVENT RECOLLECTION: Nganong mag recollect ta panahon sa Adbyento? Mao kini ang pangutana sa Resource Person nga si Rev. Fr. Romeo Coronel sa mga partisipante panahon sa Advent Recollection niadtong Disyembre 5-6, 2022 sa St. Mary of the Perpetual Rosary Parish, Buhangin, Davao City diin mikabat og 336 ka mga parokyano ang mitambong nga gilangkuban sa Sona 1-10. Nagsugod kini sa alas 7:00 sa gabii hangtod sa alas 9:00. Ang tema nagkanayon: “Atong paghinumdom sa atong pakighiusa ug sa atong paghiusa sa Ginoo.”

Kanus-a man kita nakighiusa sa Ginoo?

Matod pa ni Fr. Romy nga sa dihang gibunyagan kita nagsugod na nga nahiusa kita sa Ginoo pinaagi sa upat ka mga elemento sa bunyag: Sama sa (a) Tubig diin maoy molimpyo sa atong sala nga panulundon. Nahimo kitang partisipante sa iyang misyon ug kabahin sa kinatibuk-ang kinabuhi sa Ginoo. Bag-ong kinabuhi nga anak sa Dios ug nahimong myembro sa simbahan; (b) Ang puti nga panapton nga maoy naglimpyo sa kasing-kasing ug huna-huna, sama sa kaputli ni Santa Maria; (c) Chrism oil o lana diin nahisama kita kang Kristo. Pinaagi niini nakaambit kita sa tulo ka misyon ni Hesus. Ang pagka Pari nga maoy mogiya sa pagtuo. Ang pagka Propeta nga maoy maghatag og paglaom ug kalipay. Ang pagka Hari diin mogiya dili isip nga tag-iya apan malipayon nga maghatag og kalipay sa uban pinaagi sa gugma. (d) Ang nagsigang kandila, naguban kita kang Kristo diha sa kaalam ug kahayag sa dalan nga matarong.

Ang mga elemento sa bunyag maoy atong nadawat nga gasa gikan sa Ginoo. Unsay maayong buhaton samtang nagpaabot sa Ginoo? Maghiusa kita ilabina ngadto sa pinakaubos natong mga igsoon aron kita mahiusa sa atong simbahan ang lawas ni Kristo. Mao kini ang pinakamaayong gasa nga atong buhaton aron ang atong pagsaulog sa Pasko magmabungahon nga puno sa gugma ug kalinaw. Pinaagi sa Santos nga Misa ug sa pag-ampo sa Santos nga Rosaryo aron mahiusa sa Ginoo. (Clinita Nartea, GKK SoCCom of OMPH Panorama/Robinson | Photos: JB Berdera)